O presidente da Xunta e líder do PP na Galiza, Alfonso Rueda, aproveitou un acto de campaña en Palas de Rei (A Ulloa) para pór o foco en Altri e pedir o apoio cidadán o próximo 23 de xullo encamiñado a promover "un cambio" na Moncloa que "simplifique os trámites empresariais" e "axilice os fondos europeos". Xunto a candidatos ao Congreso e ao Senado pola circunscrición de Lugo, Rueda participou esta terza feira nunha visita ás instalacións do Grupo Jim Sports en Palas de Rei.
Durante a visita, pronunciouse sobre a situación do proxecto de Altri e lembrou que "pasou un ano" desde que lle solicitou ao presidente do Goberno español, Pedro Sánchez, os fondos europeos "necesarios para que a empresa puidese establecerse en pas de Rei" e xerar emprego na comarca. Con todo, lamentou que "a única resposta do Executivo estatal" a proxectos deste tipo sexan "moitas promesas, moitas reunións e un empeño por complicar as cousas cada día aínda máis con burocracia e marañas de trámites".
Así, proclamou que o 23 de xullo "todo isto ten que acabar para que empecen a facerse as cousas ben de verdade" e ofrézase axuda aos emprendedores. "Non pode ser que investidores que queren achegar moito capital para crear postos de traballo e que só piden beneficiarse dos fondos europeos non poidan facelo", dixo. "Están a perderse oportunidades e, como demostramos desde o Goberno galego e en concellos como Palas de Rei, cando hai administracións dispostas a botar unha man e investidores dispostos a xerar riqueza, a poboación crece e beneficiámonos todos", concluíu.
Pola súa parte, o número 1 ao Congreso por Lugo e ex conselleiro de Economía, Francisco Conde, referiuse ao Grupo Jim Sports como "un caso de éxito desde o punto de vista industrial, pero tamén de creación de emprego, fixación de poboación no rural e capacidade para atender as necesidades da cidadanía por parte do concello, que se beneficia deste éxito".
Conde defendeu a liña de traballo do Goberno galego mediante a aposta "polo éxito empresarial", con proxectos tamén radicados en Palas de Rei como o de Granxa Campomayor —declarado iniciativa empresarial prioritaria— ou Flytech. "Son proxectos que reflicten unha aposta pola Galiza industrial e innovadora, con iniciativas que xeran emprego de calidade e permiten a fixación de poboación no rural", argumentou.
E do mesmo modo que Rueda, referiuse ao caso de Altri, para lamentar que este proxecto "non estea a recibir o mesmo apoio por parte do Goberno de España como o que recibiu de Portugal". "O razoábel é que Altri teña igualdade de condicións no acceso a fondos europeos e, por tanto, permitir a vertebración da provincia de Lugo desde o punto de vista industrial", dixo.
O alcalde de Palas de Rei, Pablo Taboada (PP), contrapuxo o éxito cultivado polo Grupo Jim Sports co que, recalcou, debería ter tamén Altri. "A nosa comarca e o noso concello están cansados de tantas palabras e de tanto esperar", dixo. "Dunha vez por todas reclamamos que o Goberno estatal achegue os fondos necesarios para conseguir que o proxecto de Altri sexa unha realidade", exixiu, antes de concluír que non haberá "mellor oportunidade" que lograr que un galego, Alberto Núñez Feixoo, entre na Moncloa, como "garante" de que os recursos necesarios cheguen a Altri.
