O deputado do BNG no Congreso, Néstor Rego, dixo que o nacionalismo "non ten teito" e augurou que ten posibilidade de "seguir crecendo" como alternativa ao PP, despois que nas eleccións deste domingo obtivesen o seu mellor resultado histórico con 25 escanos no Parlamento.
"Hoxe hai unha alternativa ao PP máis forte da que había antes destas eleccións, e por tanto temos un horizonte claro", asegurou Rego nunha entrevista en RNE, recollida por Europa Press, onde sostivo que "o BNG non ten teito" e que seguirán traballando para continuar crecendo.
Segundo o deputado da formación nacionalista galega, o BNG é unha forza nacionalista, soberanista de esquerdas e "decididamente antiimperialista", e a pesar de que "todo o mundo" coñece esa posición política, o seu partido conseguiu o apoio de máis do 31% dos galegos, con case medio millón de votos.
Neste sentido, augurou que o BNG traballará por "ampliar a súa base social e electoral" e seguir crecendo como alternativa do PP na Galiza, aínda que sen "renunciar" aos seus "postulados políticos", como veñen facendo "desde sempre e especialmente nos últimos tempos".
"Sabemos que hai persoas que non eran votantes habituais do BNG e que, nesta ocasión, apostaron por unha forza política na que vían esa posibilidade de articular un cambio de rumbo", proseguiu Rego, manifestando a "absoluta certeza" de que o seu partido non defraudará aos seus votantes.
