A vicepresidenta do Parlamento e deputada de En Marea, Eva Solla, denunciou que o Goberno galego oculta información relativa ao convenio asinado coa multinacional Medtronic. Solla lembra que esta é unha multinacional que está a traballar “de xeito permanente” nas unidades de cardioloxía dos complexos hospitalarios de Santiago de Compostela, A Coruña, Vigo e Lugo “para probar os seus produtos usando as instalacións públicas en beneficio propio da empresa”.
Medtronic foi obxecto de investigación e sancións por parte doutros países
“O rexeitamento por parte da Xunta de informar e ocultar información á cidadanía é o xeito habitual de proceder do goberno galego” afirmou a parlamentar, tamén secretaria xeral do Partido Comunista de Galicia (PCG)
Despois de revisar a documentación aportada, o grupo de En Marea afirma que puido constatar que se está a permitir á esta empresa que “sexa a que dirixa o funcionamento das unidades de cardioloxía baseándose en criterios de beneficio empresarial. Un procedemento que a Xunta pretende trasladar a outras unidades”.
Medtronic foi obxecto de investigación e sancións por parte doutros países. Así, en China foi sancionada por cuestións relacionadas cun subornos e tamén en EE.UU. tivo varias condenas pola vía penal por subornos a médicos para que empregasen os seus produtos. Trátase ademais dunha empresa que está a ser vixiada pola Axencia Española do medicamento en relación ás bombas de insulina.