Galiza resístese á suba do PP polo avance do BNG

Os resultados dos comicios do 28 de maio evidencian a existencia dunha lóxica política diferente na Galiza cun comportamento e dinámica propias. Aínda que a vaga xeral en favor dunha recomposición do réxime nunhas derivadas reaccionarias e ultraespañolistas chegou ao país, a resposta electoral foi diferente, como demostra o comportamento das dereitas e o papel decisivo dun actor político que impugna o bipartidismo como expresión dunha identidade galega. A dereita medra na Galiza pero non suma para conformar unha maioría como acontece no espazo español. Se o PP sobe menos que no conxunto do Estado, Vox mantense como unha forza marxinal sen capacidade de incidencia algunha (só obtivo unha acta, en Avión, no Ribeiro). Neste sentido, o importante crecemento do BNG posibilita articular unha alternativa aos populares, partillada cun Partido Socialista á baixa, en busca dun novo camiño tras o desembarco de Gómez Besteiro no primeiro plano da liña política. O exame de Rueda Alfonso Rueda supera pola mínima a súa primeira revalida nas urnas. Malia que a foto final deixa un resultado por baixo das previsións da dirección do partido, os populares alcanzan 554.112 sufraxios, que representan 38,4% dos votos e outorgan 1.765 concelleiros e concelleiras. Neste sentido, obteñen 33.591 sufraxios e 130 actas máis que nos comicios de 2019, ao incrementar a súa porcentaxe de voto en 5,1 puntos, 4,8 menos que no conxunto do Estado, rexistrando unha suba no total do territorio galego, tanto nos ámbitos urbanos, vilegos e rurais. A maioría absoluta en Ferrol e na Deputación de Pontevedra son os éxitos máis relevantes dos populares na xornada do domingo. Neste sentido, o PP queda apartado do Goberno do resto das cidades galegas, sendo superado de forma clara por Democracia Ourensá (DO), de Gonzalo Pérez Xácome, en Ourense, onde a práctica totalidade das sondaxes o colocaban como primeira forza. Ao tempo, os populares rexistran avances nos espazos vilegos e rurais, sendo moi significativa a suba de máis de seis puntos na circunscrición de Pontevedra. O presidente da Xunta e do PP na Galiza, Alfonso Rueda, sinalou onte en rolda de prensa que "a mensaxe das urnas foi rotunda. Podemos dicir claramente que o PP da Galiza gañou as eleccións municipais, sen ningunha dúbida". Nese sentido, analizou que a mellora electoral en relación a 2019 debeuse "a que aprendemos dos erros e corriximos cousas que fixemos mal hai catro anos" e remachou que "cando gañamos, gañamos e temos que sumar maioría absoluta para gobernar". Baixada do PSdeG A baixada do PSdeG supera todas as previsións. Aínda que manteñen 420.357 votos e rexistran unha porcentaxe de 29,17%, a caída en relación a 2019 é de 75.845 sufraxios, 3,7 puntos en porcentaxe de voto e de 171 actas, ficando en 1.010 concelleiros e concelleiras. Neste sentido, o PSdeG pode respirar polos seus resultados no ámbito urbano, que lle permiten reter os concellos da Coruña, Lugo e Vigo así como as Presidencias das deputacións da Coruña e Lugo. A este respecto, destácanse as cifras dos socialistas na corporación da cidade da Muralla, onde Lara Méndez conserva o mesmo número de edís que en 2019. Os resultados do PSdeG na Galiza non se explican sen a baixada xeral da súa formación no conxunto do Estado. A mesma responde a razóns infraestruturais e superestruturais, destacando entre as primeiras a capacidade do PP para canalizar o descontento social xerado pola situación económica e entre as segundas o trunfo dos populares na batalla ideolóxica, derivado do seu control estatak dos instrumentos de creación de opinión, nomeadamente os medios de comunicación, que lle permite marcar os temas e os tempos de debate. O secretario xeral dos socialistas galegos, Valentín González Formoso, adiantou a valoración da súa formación. A este respecto, emprazou o partido "a coñecer os resultados definitivos para facer profundas análises". Porén, incidiu en que a súa formación "suma máis de 1.000 concelleiros e manterá tamén representatividade nos Gobernos provinciais". Nesta dirección, destacou que "revalidan os Gobernos das Alcaldías de Vigo, A Coruña e Lugo, mentres en Ferrol a esquerda suma máis votos que a dereita e en Santiago o PP quedará fora do Goberno". Os nacionalistas vense grandes gañadores destes comicios. Suman 590 edís, 134 máis que en 2019, e 248.676 sufraxios, o que representa 54.311 por riba das pasadas eleccións locais e 17,25% do voto, 4,4 puntos por diante da anterior convocatoria. Ao tempo, a dirección nacionalista agarda obter arredor de 37 Alcaldías, tras alcanzar 19 maiorías absolutas pode gobernar mediante acordos con outras forzas en 18 concellos. Neste sentido, o BNG conserva boa parte das súas posicións anteriores e suma novas corporacións. O avance do BNG A gran sorpresa da noite do domingo protagonizouna o BNG en Compostela, onde Goretti Sanmartín superou os socialistas e ten na súa man a Alcaldía da capital da Galiza. Nesta mesma liña, os nacionalistas reteñen Pontevedra, malia ser superado en votos polo PP así como o cogoberno de Lugo, onde o avance electoral de Rubén Arroxo non foi suficiente para aumentar a representación do BNG. Semella probábel a incorporación da formación nacionalista ao Goberno da Coruña, onde o seu apoio resulta imprescindíbel para elixir rexedora a socialista Inés Rei e ten por diante unha situación complexa en Ourense, onde son imprescindíbeis para calquera alternativa a Gonzalo Pérez Xácome, que segundo todas as fontes continuará como alcalde, co apoio tácito do PP. A portavoz nacional do BNG, Ana Pontón, asegurou onte que "os resultados confirman o cambio de ciclo político que se abriu coas pasadas eleccións galegas, nas que a cidadanía deu ao BNG a responsabilidade de ser a alternativa real ao Partido Popular". Nesta liña, insistiu en que o BNG é a forza política que máis sobe, cun incremento de 30% na cifra de concelleiros e concelleiras, 135 máis en todo o país, o que nos sitúa como unha forza política en ascenso, liderando máis Alcaldías". O futuro das mareas As candidaturas herdeiras das antigas mareas ou ligadas ao espazo de Esquerda Unida, Podemos e Sumar saen das corporacións da Coruña e Vigo. Si preservan a súa presenza na capital galega e en Ferrol. Compostela Aberta conserva 2 actas (perde 3), alcanzando a mesma representación Ferrol en Común, onde esta lista impulsada desde o mundo de Esquerda Unida rematou superada polo BNG, con 3 actas. Vox e Cs Os resultados das candidaturas municipalistas e, tamén, de Ciudadanos avanzan un final de ciclo. Precisamente, o partido laranxa desaparece do conxunto das corporacións galegas e no Concello de Lugo perdeu a súa acta a cabeza de lista e voceira galega da formación, Olga Louzao. Vox mantense como unha forza testemuñal na Galiza. As 35 candidaturas presentadas obtiveron 21.162 votos, 1,4% do total, e só unha acta na localidade de Avión (O Ribeiro), un dos núcleos con máis renda da Galiza e onde ten un peso decisivo a súa colonia emigrante residente en México.