José Luis Baltar, o home forte do PP na súa fortaleza da provincia de Ourense durante lustros, pode rematar a súa carreira política cunha condena. Xulgado por prevaricación, a fiscalía pide que se lle impoña a pena máxima de dez anos de inhabilitación, que na práctica non tería máis efecto que o simbólico -que non é pouco- posto que Baltar pai está xa retirado da actividade política, non sen antes deixar todo atado en favor do seu fillo, obxectivo para o que antes tivo que gañar o congreso para o cal, supostamente, axudouse das contratacións que agora o sentan diante dun xuíz.
O fiscal xefe de Ourense, Florentino Delgado, realizou ao comezo da presente semana esa petición após revisar toda a información referente a eses 104 postos de traballo presuntamente irregulares na Deputación nas vésperas do conclave popular. Logo dese congreso foi cando, en vista do que podía pasar, Baltar pai deixou totalmente a política e mesmo a militancia no PP en canto se fixo evidente o horizonte xudicial que lle esperaba.
Agora, a fiscalía pide dez anos de inhabilitación despois de que a defensa do encausado solicitase sen éxito o arquivo da causa e que o xuíz instrutor afirmase nun auto que existen “indicios de criminalidade” nos feitos, que o propio Baltar sabía que ían en contra da legalidade, segundo o texto.
