Democracia Ourensá (DO), o partido que lidera o alcalde da capital, Gonzalo Pérez Xácome, advertiu de que denunciará ante a Xunta Electoral o plan de debate exposto pola CRTVG, á vez que augurou que, en todo caso, con independencia do que resolva o órgano en si, a cita prevista para o día 5 na televisión pública galega será "irrelevante" e sen "apenas" audiencia.
Nun comunicado, a formación sinalou que o feito de que a TVG convide a un debate aos candidatos de "PP, PSdeG, BNG, Sumar e Podemos", mais non a DO nin a Vox significa que os populares "usan os recursos públicos para o que cre o seu beneficio: xuntar á esquerda para dividir o voto do PSOE". Non en balde, matiza que, "aínda que DO é transversal", os populares entenden que "resta máis ao PP".
Así mesmo, anticipa un recurso ao plan de debate da CRTVG e alega que o seu argumento para convocar o debate a cinco (en aras dun criterio que fixa a xunta electoral tras unha consulta de RTVE) "é feble".
En fronte, defende que "por forzas significativas" debe entenderse a lista máis votada en Ourense en 2023, "como foi DO". "O feito de presentarse agora DO só en Ourense provincia supón unha concentración que nos dá opción de ter varios deputados, con máis opcións que Sumar e Podemos", alegou.
Así mesmo, subliñou que o PP mostra unha vez máis "a súa covardía nos debates" e salientou que o seu líder, Alberto Núñez Feixoo, "evitou o debate conxunto" nas eleccións estatais, mentres que o candidato dos populares en Ourense nas municipais, Manuel Cabezas, "non compareceu na Cadea SER nin na TVG".
Xácome tamén cualificou de "instrumento" a TVG e ironizou con que, a pesar do seu orzamento anual "deficitario", o PP aínda teña "o valor" de acusar a outros de "gastar diñeiro en festa".
Así as cousas, concluíu que, con independencia de cal sexa a resolución da xunta electoral, será "irrelevante" un debate "con eses personaxes". "Máxime sen DO, por aburrido, desnaturalizado e con pouco interese. Apenas terá audiencia", resolveu.
