O ex alcalde de Ferrol Jorge Suárez e o catedrático e vicesecretario da Academia Galega Henrique Monteagudo son dous dos nomes que figuran na promotora de Sumar Galicia, un órgano que vén de arrincar os motores no tempo de desconto da lexislatura galega para presentarse nas eleccións do próximo ano.
Entre o medio centenar de nomes que figuran na lista de asinantes, segundo as fontes de Sumar Galicia, figuran outras persoas vinculadas ás mareas municipalistas e do mundo sindical. Todas elas contan coa "confianza" da líder do partido, Yolanda Díaz, quen supervisou a implantación da organización no país e quen mantivo contactos directos cos promotores a semana pasada aproveitando a súa visita a Vigo para a presentación dun libro.
Así, coa "promotora practicamente fechada" duns 50 membros -e que, despois de paralizarse a súa presentación a semana pasada, está previsto que se dea a coñecer en breve-, os nomes responden a perfís "diversos" da sociedade civil, dos movementos sociais e profesionais de "recoñecido" prestixio e representan "a diversidade do país, tamén no ámbito territorial".
Desta forma, ademais do portavoz, Paulo Carlos López, estarán na promotora as deputadas galegas de Sumar -Marta Lois e Verónica Martínez Barbeiro-, os asesores do Ministerio de Traballo Manolo Lago (ex deputado tamén no Parlamento) e José Manuel Sande (ex senador e ex concelleiro de Marea Atlántica); o ex secretario xeral de CC OO na Galiza, Ramón Sarmiento Solla; a responsábel de LGTBI de UXT-Galiza, Laura García Parada; e a socióloga, afiliada á CIG e activista do movemento feminista, Rocío Núñez Rúa.
No ámbito cultural, Sumar conta con Henrique Monteagudo, catedrático da Universidade de Santiago de Compostela e vicesecretario da Real Academia Galega. Do municipalismo, destaca o nome de Jorge Suárez Fernández ex alcalde de Ferrol e militante de Esquerda Unida-Esquerda Unida, aínda que a súa presenza está ligada á proximidade ao proxecto de Yolanda Díaz.
Tensión no espazo
De feito, é notoria a falta de implicación na promotora, polo menos polo momento, das organizacións de Podemos e Esquerda Unida (EU), que pola súa conta iniciaron as conversacións para as galegas moito antes da constitución como partido de Sumar Galicia e á espera de que este proxecto definise a súa intención de acudir ás eleccións.
Desta maneira, tras a investidura, houbo un primeiro contacto oficial das tres organizacións políticas, nas que Podemos chegou a pór encima da mesa unha proposta para fechar unha coalición a tres, proporcional.
Neste sentido, tamén EU urxiu a fechar xa unha coalición, pero Sumar Galicia abriu, pola súa conta, contactos para tratar de atraer ao proxecto a pata ‘nacionalista’ que outrora formou parte da confluencia, Anova, que nas xerais pediu o voto para o BNG.
Resposta de Podemos
Pola súa parte, o líder de Podemos na Galiza, Borja San Ramón interpelou a Sumar dicindo que “non é momento de falar de cotas”. San Ramón é de “urxencia inaprazábel fechar un acordo canto antes e comezar desde xa a traballar para un Goberno de cambio e progreso na Galiza”.
