Após o pleno decorrido en Muras na tarde desta quinta feira, desde o BNG. Formación de Goberno no municipio, sinalan que "unha vez mais voltamos comprobar como, o Partido Popular e a portavoz socialista manteñen unha alianza para tratar de bloquear o concello de Muras”.
Segundo os nacionalistas, ambos partidos da oposición están “empeñados en facer pinza contra o goberno local, aínda que sexa a costa de privar os veciños e veciñas do normal funcionamento do Concello e de que sexan atendidos no día a día”. A polémica vén dada pola dedicacións do concello.
“Para xustificar o voto en contra das dúas dedicacións parciais, o PP e o PSOE dixeron que estaría dispostos a votar só a do alcalde, e cando tiveron oportunidade de cumprir no mesmo pleno a súa palabra, volveron votar en contra dela" explican desde o BNG.
"Esta incoherencia, é froito da desesperación e da inmaturidade política da oposición, que xa non sabe que facer para bloquear e desgastar o alcalde, porque lles vale todo, con tal de impedir que Muras siga progresando e mellorando nos servizos e na atención pública co BNG no goberno. Mais, polo benestar da veciñanza de Muras, non llelo imos permitir" afirman.
"Desde o Bloque Nacionalista Galego consideramos unha auténtica irresponsabilidade a conducta da oposición, sobre todo a da edil do PSOE, Jennifer Gómez, que facilitou a investidura do alcalde do BNG para despois obstaculizar por todos os medios o goberno, unha actuación que só prexudica a veciñanza".
Para alén diso, desde o BNG apuntan que “non se pode estar mentindo e mentindo, unha vez tras outra, nin á veciñanza nin á militancia do PSOE. Ofrecémoslle en máis de cinco ocasións entrar no goberno, elixindo a área que quixera, para conformar un goberno transformador para que Muras siga avanzando, e aínda descoñecemos as razóns da negativa", explicaron.
"Pretenden derrocar o BNG"
O alcalde, Manuel Requeixo considera que “á vista de todos queda patente a alianza entre o PP e o PSOE de Muras, que como non conseguiron derrocar o BNG nas urnas, pretenden facelo agora deste modo. Do PP podía esperalo, pero do PSOE, que até hai tres días compartía goberno, propostas e inquedanzas con nós, non”.
