O director de campaña do BNG, Rubén Cela, denunciou que o PP de Alfonso Rueda acode "dobremente dopado" á carreira cara aos comicios do 18 de febreiro, porque emprega fondos públicos da Xunta "ao servizo da súa estratexia electoral" e fai unha "instrumentalización partidista" da Corporación de Radio de Televisión da Galiza (CRTVG).
Nunha rolda de prensa ofrecida esta terza feira desde a sede do partido en Santiago, Cela criticou que "non todas as organizacións" participan na precampaña "en pé de igualdade". Neste sentido, dixo que o PP acode "dopado" pola "manipulación" na CRTVG, algo que "non é algo novo nin que comezase nesta precampaña". "Detectamos que ese nivel de manipulación do ente público está a ser escandaloso, e especialmente a partir da crise dos pellets. É difícil saber onde acaba o gabinete de prensa do PP e onde empezan os informativos da CRTVG", continuou.
O dirixente nacionalista evidenciou que esta situación é "ben" coñecida polos traballadores e traballadoras do ente público que promoven a campaña dos 'Venres Negros' e que, precisamente, esta quinta feira protestarán ante a sede da Xunta en San Caetano pola cobertura da vertedura do granulado plástico.
En segundo lugar, Rubén Cela denunciou o emprego de diñeiro das arcas autonómicas "cun profundo carácter electoral". Ao respecto, mencionou iniciativas como o anuncio do 'Bono Coidado non Fogar' e o envío de cartas asinadas polo presidente da Xunta, Alfonso Rueda, aos maiores co novo carné +65. "Máis aló de que sexan legais ou non, desde unha perspectiva ética entendemos que non é razoábel", aseverou.
Xunto a isto, Cela lamentou que o PP empregue "a mentira, a calumnia e a difamación" ao acusar a semana pasada á oposición de impulsar unha campaña de 'fake news' sobre a vertedura de pellets e cun suposto "armazón de bots rusos". A isto sumou o responsábel do BNG que os populares os intenta "vincular con ETA". "Só falta que nos acusen de ter financiamento de Irán, Venezuela ou de sabe Deus onde", ironizou.
"Un insulto á intelixencia"
Para o director de campaña do Bloque, estas acusacións "non teñen ningún soporte" e son non só "unha falta de respecto" á formación nacionalista, senón "un insulto á intelixencia" dos galegos. Cela achacou esta actitude dos populares a que están "nerviosos" porque, parafraseando unhas declaracións do líder estatal do PP, Alberto Núñez Feixoo, poden estar "a un puñado de votos de perder a maioría absoluta".
Por todo iso, o nacionalista non augura "nada bo" de cara á campaña, da que sospeita que pode ser "especialmente enlamada", que é "onde se move ben o PP" para evitar "falar dos problemas dos galegos", como a Atención Primaria, a vertedura de pélets plásticos e a situación da factoría de Alcoa en San Cibrao.
