A portavoz nacional do BNG, Ana Pontón, recriminoulle ao presidente da Xunta da Galiza, Alberto Núñez Feixoo terminar o ano coa atención primaria colapsada e asegurou "que non fixo nada para reforzala".
Na súa valoración do discurso de fin de ano, Pontón aseverou que "os sanitarios están exhaustos e necesitan máis que boas palabras".
A líder nacionalista tamén lamentou que o 2021 feche coa atención primaria nesta situación e achacouno a que contan con "menos recursos que cando Feixoo chegou ao Goberno".
Pontón replicou ao presidente da Xunta que "o primeiro paso para solucionar os problemas do país é admitir que existen en lugar de negalos".
Para a líder do BNG “un ano máis, vemos que os problemas cos que empezamos non se solucionan senón que se agudizan", alegou.
Da mesma maneira, sinalou o que son, segundo a portavoz dos nacionalistas, outros dos problemas da Galiza como a emigración xuvenil, o sistema das residencias de maiores e o descoñecemento sobre en que se investirán os fondos 'Next Generation'.
Porén, Pontón quixo dar unha mensaxe de optimismo dicindo que "as galegas e os galegos demostraron que son capaces de estar a altura e de dar o mellor na adversidade e nas dificultades e esa é a mellor base para poder encarar o 2022".
