A líder do BNG, Ana Pontón, acusou o presidente da Xunta, Alberto Núñez Feixoo, de ter "o corazón de pedra para maltratar así o persoal da Atención Primaria", xa que o sistema, dixo, está "ao bordo do colapso", e mentres a Xunta aprobou este mes os orzamentos para 2022 "cun recorte de recursos" para este servizo.
"Terminamos o ano cos mesmos problemas cos que o iniciamos, moitos deles mesmo agravados ante a incapacidade da Xunta de achegar solucións como no caso do colapso da Primaria", denunciou a nacionalista nunha rolda de prensa para facer balance deste ano no Parlamento.
Resulta "rocambolesco", dixo, que aproben uns orzamentos con 2,2 millóns de euros menos, tendo en conta que "hoxe a Primaria ten 47 millóns menos que en 2009”.
Aliás, en servizos sociais, para Pontón tampouco houbo avances cara a un modelo público de residencias "que garanta unha vellez digna". Nada, igualmente, para frear a desertización industrial, coa crise de Alcoa prolongándose "sen que a Xunta mova un dedo para a intervención pública".
Nese sentido, aludiu á perda na última década de 14.700 empregos no sector industrial. A suba do prezo da luz e o "veto do PP" á proposta do BNG para unha tarifa eléctrica galega foi outro dos temas mencionados por Pontón, xunto á precariedade e emigración xuvenil.
Tamén aludiu ao "empeño do PP en impor unha democracia de baixa calidade” tentando "amordazar o Parlamento" e exercer o "control partidario sobre os medios de comunicación públicos".
Contra a reforma do PP
Preguntada pola prensa sobre a reforma laboral, Pontón afirmou que "a esquerda decepciona [en alusión ao Goberno español] cando non cumpre o prometido" e deixa "intacta" a reforma laboral do PP. "Onde está e vai seguir o BNG é no obxectivo de derrogar esa reforma laboral", advertiu.
