Lindy Hop

OLindy hop é un estilo de baile ligado ao swing dos anos 30 e popularizado en Harlem (Nova York) por bailaríns afroamericanos nunha sala de baile chamada Savoy Ballroom. Hai xa dez anos que chegou con forza a Galiza. Estes días tiven a oportunidade de falar con algúns dos profesores deste estilo no país: Elena Branco e Jorge Patiño de Swing On (Vigo) e Carlos Tomico de Alfaia Danza (Santiago de Compostela). Elena e Jorge aprenderon en 2010 no Porto, onde traballaban dando aulas de español para estranxeiros. Comezaron a ir a festas e reunións arredor do swing e entraron nun microcosmos no que había xente de todas as partes do mundo. Posteriormente, en 2013, despois de ficar sen traballo, deciden voltar a Galiza. Unha vez aquí procuran aulas de Lindy Hop sen atopar nada, o que os motiva para comezar a ofrecer este servizo eles mesmos. En 2014 fundan Swing On, ofrecendo aulas primeiro en Bueu e logo en Vigo, onde residen actualmente. Desde o principio teñen unha moi boa acollida. "O que máis engancha a xente é o sentimento de comunidade. Este baile ten un compoñente cultural moi potente, con raíces moi profundas", di Carlos Tomico, "e moitos fican pola boa onda". Elena engade que "a xente venos bailar, quere unirse, e proba a vir ás aulas". Carlos coñece o Lindy en festas en Madrid, en 2013, e decide recibir aulas. De volta en Galiza, coñece a Elena e Jorge e entra de cheo na escena viguesa de baile swing. "Alén dun colectivo en Compostela que afirma ter traído un profesor de Lindy hai uns anos… Até onde eu sei, Swing On é a primeira escola de Lindy en Galiza", comenta Carlos, que comezou a ensinar en Alfaia Danza -no ano 2014- animado por Karen Campos McCormack (quen precisaba dun compañeiro para apoiar as súas aulas). En canto ao desenvolvemento de ditas sesións, Carlos pon de manifesto que ultimamente hai un maior interese pola dimensión máis cultural do baile e da música, tentando profundar nos valores do estilo e procurando unhas sesións máis inclusivas. Esta é unha tendencia xeneralizada, como nos confirman Jorge e Elena, especialmente tras o asasinato de George Floyd e o movemento Black Lives Matter. As aulas, ademais dos pasos, tratan de centrarse en cuestións como fluidez, musicalidade (aprendendo a diferenciar formas como aaba, blues, rhythm and changes, etc.), percusión corporal, solo jazz (baile sen parella), expresión corporal… e o máis importante: adaptarse aos grupos e ao alumnado. Para os amantes deste estilo de baile, temos, no país, unha oferta moi ampla: un evento internacional (Swing On The Sea), bailes sociais e "clandestinos". O Swing On The Sea é un festival de catro días que inclúe: aulas de baile, concertos, jam sessions, visita ás Cíes, batallas de DJ, pícnic cultural arredor do swing no Castro de Vigo, etc. Os bailes sociais son eventos organizados en salas e locais de diferentes cidades para bailar swing. Os clandestinos son quedadas informais na rúa ou en parques feitas de xeito improvisado previa proposta dalgún bailarín ou bailarina. Para entrar en contacto con este estilo e asistir a eventos, bailes, clandestinos e aulas, recomendamos contactar con: Swing On (Vigo), Compostela Swing e Alfaia Danza (Compostela) e Loopy Hoppers (A Coruña). En setembro abren matrícula.