Recentemente dicía en declaracións a Nós Diario o vicepresidente da Fundación Alexandre Bóveda e neto do histórico galeguista represaliado, Valentín García Bóveda, que "se miramos cara ao futuro, temos moito que recuperar", en referencia á devolución do Pazo de Meirás ao dominio público e en clara oposición ás mensaxes que instan a "non tocar o pasado".
Con ese mesmo propósito nace o movemento Mocidade Galega pola Memoria (MGM), que na vindeira segunda feira, 16 de agosto, organizará na praza de Santa María de Pontevedra —ás 20 horas— o seu primeiro acto público para dar a coñecer os seus obxectivos.
"A memoria histórica é unha materia pendente no noso país. Hai diferentes asociacións e movementos que están a lograr grandes avances, mais falta involucrar á xente nova", sinala a este xornal un dos seus promotores, Diego Bará.
Para el, a mocidade debe xogar un papel "moi activo" en defensa dunha "verdade" que "non se está a ensinar" no actual sistema educativo. "Moitas mozas e mozos non coñecen a nosa historia porque a partir dunha falsa Transición pretendeuse ocultar, e rachouse co pasado sen vontade ningunha de dalo a coñecer. Nos institutos ofrécese un relato manipulado, é difícil que a mocidade de hoxe coñeza toda a verdade", engade.
A Illa da Memoria
Malia non estar aínda constituída de forma oficial a organización, o pasado domingo a MGM realizou unha primeira acción simbólica en Santa Cristina de Cobres (Vilaboa), fronte á Illa de San Simón (Redondela), a fin de denunciar o uso que se lle está a dar "como espazo de goce e lecer".
Durante o Goberno bipartito recibira a denominación de Illa da Memoria, mais a chegada de Alberto Núñez Feixoo a San Caetano en 2009 provocou que perdese este título e pasase a ser cualificada como Illa do Pensamento. "Estanse a organizar diferentes actividades [coma o festival de música SinSal] que non respectan o espazo nin a súa historia. San Simón foi un campo de concentración durante o franquismo e isto é algo que pouca xente sabe, polo que cómpre reivindicarmos a illa como un lugar de memoria e de homenaxe ás vítimas", argumenta Bará.
Homenaxe ás vítimas do franquismo
O acto de presentación da MGM decorrerá en Pontevedra na véspera do Día da Galiza Mártir [17 de agosto], unha escolla que non é casual. "É unha data moi significativa para os colectivos memorialistas galegos e queremos presentar o noso traballo e obxectivos rendendo homenaxe ás vítimas do franquismo. Contaremos coa presenza de familiares de persoas represaliadas", adianta.
"Nestes primeiros días estamos a artellar unha campaña de apoios con persoeiros de diferentes ámbitos como a cultura. Xente moza, con forza e habilidades comunicativas como María Prado Rúa [creadora de contidos dixitais], que nos pode axudar a levar a nosa mensaxe ás persoas máis novas e permitir que coñezan unha historia absolutamente descoñecida", salienta.
🗣➡️ "As mozas tamén estamos concienciadas. Loitade por un mundo máis xusto".
— m_g_memoria (@m_g_memoria) August 7, 2021
.@rua_prado María é creadora de contido en galego. Grazas polo teu apoio. Seguimos💜 pic.twitter.com/w0qyQnOAmC
Tamén Carlos Babío, Goretti Sanmartín, Mercedes Queixas, Luís Bará ou Alberte Mera amosaron estes días publicamente o seu apoio á iniciativa.
.@cbabio protagonista da loita pola recuperación do Pazo de Meirás envía o seu apoio a Mocidade Galega pola Memoria. Grazas, Carlos! Seguimos sumando nesta andaina ✊🏽 pic.twitter.com/OmkbDeQibZ
— m_g_memoria (@m_g_memoria) August 9, 2021
.@oalberte "é moi importante o papel da mocidade para a verdade, a xustiza e a reparación das vítimas do fascismo e a denuncia para que ningún crime quede impune"
— m_g_memoria (@m_g_memoria) August 12, 2021
Neste 12 de agosto contamos co apoio de Alberte Mera. Grazas polo teu traballo na memoria de Moncho Reboiras ✊🏽👏🏽 pic.twitter.com/4kAwfwFSPU
"A Xunta e o Estado actúan con certa equidistancia no tocante á memoria"
O Goberno do Estado levará nas vindeiras datas ao Congreso o seu proxecto de Lei de Memoria Democrática, un texto que tenta afianzar os propósitos recollidos na Lei de Memoria Histórica de 2007 e cuxas accións deixou sen financiamento o Executivo de Mariano Raxoi. Aliás, a Administración vén de gañar a súa primeira batalla xudicial aos Franco no xuízo pola titularidade do Pazo de Meirás. Mais, a pesar destes avances, fican aínda numerosas homenaxes a distinguidos membros da ditadura por todo o país.
"Até o de agora non houbo un traballo constante por parte das Administracións, tanto a Xunta coma o Estado actúan con certa equidistancia. O Goberno galego non moveu un dedo pola recuperación de Meirás", lamenta Bará, quen bota en falta "máis políticas públicas que defendan realmente a memoria".