Lugo homenaxea o labor da mestra Andrea López Chao na emigración

A área de Cultura da Vicepersidencia recoñece o traballo da mestra mindoniense emigrada a Cuba onde desenvolveu, a comezos do século pasado, un labor pioneiro na defensa do dereito á saúde e á educación das mulleres.
Iria Castro nun acto de homenaxe a Andrea López en Mondoñedo.
photo_camera Iria Castro nun acto de homenaxe a Andrea López en Mondoñedo.

A área de Cultura da Vicepresidencia da Deputación de Lugo levará a cabo esta terza feira, no Salón de Actos do Pazo de San Marcos a presentación do libro de actas Camiño de Santiago e Emigración. Homenaxe a Andrea López Chao. O acto, que comezará ás 20 horas, contará coa presenza da deputada de Cultura Iria Castro e do doutor en Estudos Culturais e coordinador das actas das Xornadas do peregrino Abrindo Camiño Daniel Vázquez.

Este acto recoñece o traballo da mestra mindoniense Andrea López Chao emigrada a Cuba onde desenvolveu, a comezos do século pasado, un labor pioneiro na defensa do dereito á saúde e á educación das mulleres. Durante todo o acto estará presente a música de Tropupelear con Branca Villares e Pablo Pintor.

Esta presentación continuará co coloquio Muller e familia: 100 anos entre a miña bisavoa e eu e a proxección do teaser O Poder de Educar: Andrea López Chao, no que participarán a directora do documental Violeta Ramos, a doutora en psicoloxía na Universidade da Habana e bisneta de Andrea, Patricia Arés Muzio; o cronista de Mondoñedo Antonio Reigosa e Daniel Vázquez. Tamén se levará a cabo a presentación dunha páxina web na que se recompila o traballo realizado sobre a figura de López.

Vázquez detallou que esta actividade busca dar a coñecer a imaxe de Andrea López. "Cúmprense 150 anos dende o seu nacemento e o seu labor ao chegar a Cuba foi esencial para as mulleres galegas, dándolles acceso ao sistema sanitario sen importar a súa condición. Andrea foi un referente feminista, en educación, igualdade e migración, e o seu esforzo sentou as bases sociais para as emigrantes galegas en Cuba".

Andrea López Chao

Nada en Mondoñedo en 1874, Andrea López Chao emigrou a Cuba en 1904 despois de gañar por oposición  a praza de directora do Plantel Educativo do Centro Galego da Habana. Foi a primeira muller Vicepresidenta da Sociedade "Hijas de Galicia" e como representante deste colectivo, que chegou a perto de sesenta mil asociadas, participou no I Congreso de Mulleres de Cuba, celebrado en 1923.

Participou na creación, en 1917, da Sociedade "Hijas de Galicia"para axudar, acoller e asistir sanitariamente  as mulleres galegas emigradas en risco de  exclusión social e para acometer este obxectivo impulsou en 1924 a creación do Hospital e posteriormente do Balneario de "Hijas de Galicia- Concepción Arenal".

Máis en MEMORIA E HISTORIA
Comentarios