Das máis de 6.000 linguas que aínda se falan no mundo, 634 superan as 300.000 persoas falantes, un dos principais criterios dos que bota man o Ministerio de Cultura de Francia para elaborar o seu Barómetro das Linguas do Mundo. O peso do idioma na tradución, os artigos publicados na Wikipedia, a normalización lingüística na escrita ou o papel no ensino universitario son algunhas das outras cuestións que analiza este estudo e que sitúan o galego como a 37ª lingua máis relevante a nivel mundial, xusto por riba do euskera.
"Cal é o idioma máis falado no mundo? Cantas persoas falan este idioma? Este enfoque expón un dobre problema: por unha parte, o reconto de falantes non é unha ciencia exacta e as fontes dispoñíbeis dan cifras diferentes e non sempre chegan ás mesmas clasificacións; por outra, outros factores desempeñan un papel na determinación do 'peso' das linguas", xustifican os autores do informe, que se vén elaborando na última década cada cinco anos.
A lingua galega obtén neste ránking unha puntuación global de 5,538 sobre 13, o número de aspectos valorados, que poden obter unha nota máxima de 1. A primeira posición é para o inglés (10,870), seguido do francés (9,351) e o español (8,924) no podio.
Estes tres idiomas, canda o cuarto posicionado, o alemán (8,435); o quinto, ruso (7,439), e o sexto, italiano (7,430), sitúanse agora na mesma posición que no barómetro anterior, de 2017. Os cinco primeiros —do inglés ao ruso—, de feito, manteñen o posto invariábel desde o informe presentado en 2012. A primeira mudanza na táboa prodúcese co sueco (7,064), que ascendeu da décima á sétima posición.
Pero a maior evolución dentro dun 'top-50' que en 2017 fechaba o galego é precisamente a que experimenta a nosa lingua, co maior crecemento na táboa xusto despois do idioma que se fala en Euskal Herria: a lingua galega sobe trece postos —igual que o vietnamita e o islandés—, mentres o euskera repunta catorce. O catalán, pola súa parte, é duodécimo, ascendendo cinco postos a respecto de 2017, mentres o asturiano irrompe con forza ocupando a 50ª posición.
O galego fica por riba a nivel de relevancia doutras linguas que superan con folgura o número de falantes como o hindi —máis de 500 millóns de falantes e 39ª no Barómetro—. O estudo amosa a debilidade do galego en distincións internacionais á súa literatura —premios obtenidos a nivel mundial polos seus escritores e escritoras—, criterio no que non obtén ningún punto, se ben o que atinxe á tradución deixa un rexistro alentador: case 0,6 puntos en obras traducidas ao galego e 0,485 en obras en galego que pasaron a outros idiomas.
A máxima puntuación obtena da penetración do idioma da Internet (0,937 puntos), mentres o contador fica tamén a 0 en vehicularidade —capacidade de sumar falantes que teñan a lingua como secundaria—. O status oficial do idioma (0,011) e a baixa taxa de fecundidade da Galiza (0,053) son os outros factores que condicionan á baixa a súa puntuación.
Tendo en conta só os factores intrínsecos á lingua —entropía, vehicularidade, status, traducións en ambas as direccións ou ensino universitario—, o galego caería até o 47º posto; contando só os demográficos —número de falantes ou fecundidade—, a lingua do país non entraría sequera no 'top 50', e no caso dos criterios denominados de prestixio —premios literarios ou artigos na Wikipedia—, sería 44º.
