Venezuela: A FANB pronúnciase contra os plans violentos da dereita

Son ben coñecidas as palabras de Lula e de Jimmy Carter sobre as eleccións venezolanas. Lula, no seu momento, asegurando con humor que en Venezuela hai un exceso de eleccións e que, cando non as hai, Chávez invéntaas. E Carter afirmando que o sistema electoral venezolano é un dos mellores do mundo. En todo caso, nos últimos 24 anos, houbo 29 procesos electorais de carácter nacional, o cal non é pouca cousa. A pesar diso, a hexemonía mediática impuxo a imaxe de Venezuela como a dun “réxime ditatorial”, tanto durante a presidencia de Chávez como na de Maduro, gañadas ambas, como se sabe, a través dun proceso de votación libre, universal e secreto. Pero, onde se orixina tal imaxe terxiversada de Venezuela? A idea provén dunha oposición dereitista que, argumentando vicios nos procesos electorais, paradoxalmente é a mesma que, ao longo de todos estes anos, evidenciou un especial gusto pola violencia. Basta un breve inventario do tipo de accións que caracterizou a oposición, para darse conta diso. Léase con atención: Golpes de Estado planificados con uso de francotiradores contra a multitude, utilización de sicarios para o asasinato de líderes populares, accións terroristas con explosivos, incendios de edificacións públicas e de autobuses, linchamento e queima de persoas, uso de cables de aceiro para decapitación de motoristas, ataque a instalacións militares. Intentos de magnicidio. Asociación con bandas paramilitares, así como con grupos de narcotráfico. Guarimbas e promoción de desordes armadas nas rúas. En Venezuela, Goberno e pobo, co apoio da forza armada, encamíñanse a un novo proceso electoral Tamén, intentos de invasión por diversos lugares con forzas mercenarias. Ataques contra os centros neurálxicos da rede eléctrica, así como contra instalacións da industria petroleira. Ademais, usurpación de funcións de Goberno, recoñecemento a un falso presidente autoproclamado, solicitude reiterada de intervención por parte de exércitos estranxeiros, apoio ao bloqueo norteamericano, así como ás ilegais medidas coercitivas unilaterais contra Venezuela; complicidade no secuestro e roubo dos activos no exterior… Eleccións presidenciais Ocorreu, con todo que, dun tempo para acá, fóronse dando cambios importantes no seo da oposición, xa moi fragmentada. Por mor do cal, boa parte dela, a pesar de estar marcada con tan intenso prontuario, decidiu renunciar expresamente á vía violenta para acollerse ao camiño electoral, recoñecendo así o Goberno lexítimo de Nicolás Maduro. Iso introduciu un cambio de panorama, nun país que se encamiña a unhas eleccións presidenciais, fixadas pola Constitución para 2024. De maneira que agora atopamos, por unha parte, un sector da oposición que di acollerse ás regras de xogo democráticas e, pola outra, unha rama ultradereitista buscando que o proceso electoral se desfaga no traxecto. Así as cousas, este sector opositor violento, que fai vida activa contra o seu propio país nos predios dos EEUU e de Europa, sentíndose “guapo e apoiado” (segundo a expresión venezolana) como en efecto non deixa de estalo, non tivo reparo en reivindicar unha vez máis o seu rexeitamento ao “réxime” e a súa intención de chegar “até o final”. Foi a través dunhas declaracións do prófugo da xustiza, Antonio Ledesma, refuxiado en Madrid, onde se insistiu na idea dunha rebelión, para a que se afirmou estar a traballar activamente e mesmo “falando con militares”. Forza Armada Bolivariana Ante estas circunstancias de promoción por parte de sectores dereitistas, dunha volta á violencia e aos intentos de desestabilización, o presidente Maduro autorizou a Forza Armada Nacional Bolivariana (FANB) a expresarse publicamente respecto diso. O día 23 de agosto a FANB así o fixo, a través dun comunicado de extraordinaria contundencia, rexeitando tales chamados á violencia e conectándoos directamente cos plans intervencionistas e inxerencistas do imperio. Nese comunicado, a FANB manifestou unha vez máis a súa lealdade ao presidente e o seu compromiso co pobo en “perfecta fusión cívico-militar”. O comunicado, subscrito polo ministro do Poder Popular para a Defensa, o xeneral en xefe Vladimir Padrino López, expresou, ademais, que, defendendo a paz, a concordia e o diálogo, a FANB saberá responder de maneira firme aos chamados golpistas, mantendo intacto o irrenunciábel dereito dos venezolanos a ser libres, soberanos e independentes. Desta maneira, pode dicirse que en Venezuela, Goberno e pobo, co apoio da forza armada, encamíñanse a un novo proceso electoral, cun bo ánimo colectivo de tranquilidade e de paz, pese á chantaxe do bloqueo e das presións a que a nación vese sometida.