Trump comparece ante a Xustiza por intentar un autogolpe de Estado ao perder as eleccións de 2020

O ex presidente dos Estados Unidos entre 2017 e 2021, Donald Trump, debe presentarse esta quinta feira no tribunal federal de Washington D. C., a capital estadounidense, para comparecer diante da xuíza Tanya Chutkan, que procederá á lectura dos catro cargos dos que foi acusado á última hora da cuarta feira polo fiscal especial Jack Smith, que o acusa de intentar perpetrar un golpe de Estado para manterse no poder tras perder o republicano as eleccións de novembro de 2020 fronte ao demócrata Joe Biden. Smith inculpa Trump de conspiración para defraudar os Estados Unidos, conspiración para obstruír un procedemento oficial, obstrución dun procedemento oficial e conspiración contra o dereito ao voto, relatando como o ex mandatario impulsou a difusión de acusacións de fraude electoral que sabía falsas e premeu para modificar os resultados electorais, antes de incitar ao asalto do Capitolio por parte dos seus seguidores como un último intento de conservar a Presidencia. Os cargos coas maiores penas alcanzan os 20 anos de prisión. O fiscal referiuse aos eventos do 6 de xaneiro de 2021, que unha investigación do Congreso definiu como un intento de golpe de Estado, “un ataque sen precedentes á sede da democracia estadounidense”, no marco dunha “conspiración” para “inverter os resultados lexítimos das eleccións presidenciais mediante afirmación falsas deliberadas”, cun Trump “determinado a permanecer no poder”. "O asalto ao Capitolio non ocorrería sen Trump" Esta é a terceira acusación penal contra Trump, o primeiro ex presidente que enfronta esta clase de cargos, tras a anunciada en marzo en Nova York por falsificación de rexistros comerciais para ocultar pagos secretos a ex amantes cando xa estaba casado, e a de xuño, con 40 cargos por reter ilegalmente documentos confidenciais ao rematar o seu mandato e obstruír a Xustiza. Amais, prevese nas vindeiras semanas unha cuarta acusación polo intento de reverter os resultados electorais de 2020 en Xeorxia. Aínda que a lexislación dos Estados Unidos non veta a participación en procesos electorais de persoas condenadas —coa excepción da insurrección, cargo do que non foi acusado até o de agora en ningún proceso xudicial—, o desenvolvemento dos xuízos coincidirá coa campaña para as primarias nas que demócratas e republicanos escollen a súa candidatura ás presidenciais de novembro de 2024, e cuxas votacións comezan os primeiros días do vindeiro ano. A acusación A Fiscalía debulla que, en paralelo ás denuncias da suposta fraude electoral para crear incerteza e ás demandas xudiciais neste sentido, Trump e os seus aliados desenvolveron listaxes de falsos electores en sete Estados nos que a diferenza entre os sufraxios de ambas as formacións fora pequena, Arizona, Xeorxia, Michigan, Novo México, Nevada, Pensilvania e Wisconsin. Unha ex asistente da Casa Branca di que o xefe de gabinete de Trump queimaba documentos após perder as eleccións Nos Estados Unidos a elección do presidente é indirecta, polo que non é estraño que o mandatario electo sume menos votos que o seu opoñente derrotado. Cada Estado outorga un número de persoas compromisarias, esas electoras son as que votan finalmente unha ou outra candidatura no Colexio Electoral dependendo do resultado, e o Congreso verifica os datos definitivos, o cometido que desempeñaba na sesión interrompida polo asalto dos partidarios de Trump. Malia que esas electoras e electores falsos foron recrutados co apoio do Partido Republicano insistíndolles en que os seus nomes só serían utilizados de prosperar os litixios sobre a suposto fraude electoral, un correo electrónico dun avogado que axudaba a Trump, Kenneth Chesebro, recolle que o plan consistía en presentar “as listas fraudulentas como unha alternativa ás listas lexítimas no proceso de certificación do Congreso”. Algo que chegou a acontecer, pois o lexislativo recibiu documentos falsificados do Colexio Electoral asinados por estes electores que nomeaban a Trump como gañador das eleccións nos sete Estados. Unha vez se avanzaba o fracaso do plan, comezou a presión sobre o vicepresidente de Trump, Mike Pence, para que usase os certificados falsos na sesión do Congreso e atrasase a proclamación de Biden como presidente, ou directamente para que dese validez ás falsificacións e declarase a vitoria de Trump, algo que Pence rexeitou. De feito, a acusación explica que a alocución de Trump aos seus partidarios antes do asalto do Capitolio, na que lles pediu “loitar como demos”, foi un intento de premer a Pence. Outras seis persoas non identificadas foron incluídas na acusación como co conspiradoras. Asalto ao Capitolio dos EUA: a extrema dereita na UE xoga ao despiste Pola súa parte, Trump cualificou a acusación como “outro capítulo corrupto no intento da familia criminal de Biden para interferir nas eleccións presidenciais de 2024”, após defender o seu comité de campaña que o ex presidente seguiu sempre a lexislación vixente. Tamén saíron na súa defensa as principais voces do Partido Republicano. O presidente da Cámara de Representantes, Kevin McCarthy, fixo fincapé en que se trata dunha tentativa de “atacar o principal candidato ao nomeamento republicano” para as presidenciais. Á vez, Ron DeSantis, gobernador de Florida e principal rival de Trump nas primarias, deixou entrever que Trump non terá un xuízo xusto na capital estadounidense. Xa con menos posibilidades na carreira aparece Pence, que apuntou que “calquera que se poña por riba da Constitución nunca debería ser presidente". Os xuízos marcan a precampaña para as primarias e as presidenciais de 2024 O mandatario estadounidense, Joe Biden, a pasada semana en Washington D. C. (Foto: Annabelle Gordon / Europa Press / Contacto) Ademais das acusacións contra Trump, tamén o caso do fillo de Biden, Hunter, está a ter un importante peso na precampaña. Os republicanos cuestionaron o papel da Fiscalía nos procedementos abertos contra o ex mandatario ao comparalo coa situación de Hunter Biden, acusado de non pagar impostos e ter unha arma de fogo cando consumía drogas, e que chegou a un acordo coa Fiscalía para non entrar en prisión, mais que unha xuíz federal se negou a validar polas cláusulas beneficiosas para Biden que incluía o pacto. Nos últimos meses, as enquisas describen un escenario moi igualado no caso dun enfrontamento electoral entre Biden e Trump, e este último contaría con máis de 30 puntos sobre DeSantis para facerse coa candidatura, no medio de choques constantes no lexislativo entre republicanos e demócratas. Donald Trump, de novo no albo: imputado no caso dos documentos clasificados Ao respecto, nos últimos 20 anos produciuse “unha deterioración constante nos estándares de gobernabilidade”, con repetidas negociacións para ampliar o teito da débeda que poñen en risco a capacidade do Goberno dos Estados Unidos de asumir as súas obrigas económicas, sostivo onte a axencia estadounidense Fitch, que baixou a AA+ a cualificación crediticia do país. É a segunda grande axencia do ámbito que lle nega a cualificación máxima ao país. Mentres fondos de investimento alertan da vulnerabilidade dos mercados perante esta información, que implicaría un aumento dos custos de financiamento dos préstamos ás institucións, a Casa Branca insistiu en que a medida “desafía a realidade”, e a secretaria do Tesouro, Janet Yellen, reiterou que é unha decisión “arbitraria".