Sánchez mantén o seu núcleo duro no novo Goberno español, do que fica fóra Podemos

Un novo Executivo para “dar prioridade ao diálogo e á negociación”, así como ás “políticas sociais”, destacou hoxe o presidente español, Pedro Sánchez (PSOE), na presentación da composición do seu novo Goberno, que defendeu, terá “un marcado acento feminista, con catro vicepresidentas e con máis ministras que ministros”, unha vez que prometan os cargos na mañá da terza feira. Este Goberno será “de continuidade” a nivel económico e nos “chamados” ministerios de Estado, explicou Sánchez, que incidiu en que terá un “alto perfil político” para “dotar de estabilidade” a lexislatura. Sumar, a póla minoritaria da coalición de Goberno, contará con cinco dos 22 ministerios. A diferenza de varios dos seus predecesores e entre unha caída do poder autonómico do PSOE nas últimas votacións, ficando apenas con Asturias, Nafarroa e Castela-A Mancha, medios de comunicación españois apuntaron que Sánchez puido conformar o seu Goberno coas mans libres e sen negociacións no seo da formación. Isto explica que, a pesar de que sen o bo resultado en Catalunya o 23 de xullo dificilmente tería obtido a Presidencia, o xefe do Executivo reduza a só un militante do Partit dels Socialistes de Catalunya (PSC) a súa presenza no Consello de Ministras e Ministros, desde os dous que tiña no último lexislativo. O elixido foi o ex alcalde de Barcelona Jordi Hereu para o Ministerio de Industria. As tres primeiras vicepresidentas seguirán no posto. Nadia Calviño na primeira co Ministerio de Asuntos Económicos, Yolanda Díaz na segunda con Traballo e Teresa Ribera na terceira con Transición Ecolóxica e Reto Demográfico. Con todo, nesta ocasión haberá unha cuarta vicepresidenta, María Jesús Montero, que seguirá en Facenda e Función Pública. Sánchez toma posesión como presidente español mentres ex militares reclaman un golpe de Estado Na sección do Executivo nomeada polo PSOE continuará á fronte de Defensa Margarita Robles, Fernando Grande-Marlaska en Interior, Luis Planas en Agricultura, Pesca e Alimentación e José Manuel Albares en Exteriores. Así mesmo, Félix Bolaños engadirá ás súas competencias o Ministerio de Xustiza, mentres segue en Presidencia; Diana Morant suma Universidades a Ciencia e Innovación e Pilar Alegría tamén quedará con Deportes amais de Educación, e será a nova voceira do Goberno. Outra das que proseguirá no Consello de Ministras é Isabel Rodríguez, que pasa de Política Territorial a Vivenda e Axenda Urbana, ao tempo que José Luis Escrivá abandona Inclusión, Seguridade Social e Migracións por Transformación Dixital. Pola súa parte, Elma Saiz, voceira do grupo municipal do PSOE en Iruña, a capital de Nafarroa, será a nova ministra de Seguridade Social e Políticas Migratorias. Saiz tamén foi conselleira de Economía e Facenda do Goberno foral e é da confianza da presidenta navarra, María Chivite. En Transportes, un dos ministerios que perde o PSC xunto con Cultura e Deporte, o ex alcalde de Valladolid, Óscar Puente, é o novo titular, após protagonizar a réplica do PSOE na sesión plenaria do fracasado intento de investidura do presidente do Partido Popular, Alberto Núñez Feixoo. Entre os presidentes territoriais que perderon o cargo en maio, Sánchez optou polo canario Ángel Víctor Torres como novo ministro de Política Territorial e Memoria Democrática, e en Igualdade, que na anterior lexislatura ocupou Unidas Podemos (UP), con Irene Montero á fronte, será ministra Ana Redondo, ex voceira do PSOE en Castela e León e próxima a Puente. Completan o Executivo os ministros de Sumar, alén de Díaz, situándose á fronte de Cultura Ernest Urtasun; de Sanidade Mónica García -carteira que abandona o galego José Miñóns, que chegou ao cargo a finais de marzo logo de ser delegado do Goberno estatal na Galiza e alcalde de Ames, na comarca de Compostela-; de Dereitos Sociais, Consumo e Axenda 2030, Pablo Bustinduy; e de Infancia e Xuventude, Sira Rego. Miñóns, o ministro de Sanidade que puxo fin definitivamente á pandemia no Estado Rueda O presidente galego, Alfonso Rueda (PP), recalcou o “pouco peso” do Partido dos Socialistas de Galicia (PSdeG) no Executivo estatal, e atribuíu o número de ministerios ás “hipotecas” de Sánchez cos seus socios, culpándoo por non reducir o volume do Gabinete. Tamén afirmou a súa “disposición” a traballar co novo Goberno e confiou en que a relación sexa a “mellor posíbel”. Pontón A voceira do Bloque Nacionalista Galego (BNG), Ana Pontón, desexou ao Goberno estatal “acerto no seu desempeño”, citando retos como a crise de prezos, o cambio climático ou unha “situación social que non é fácil para a maioría”. Nese sentido, fixo énfase en que o BNG será “moi exixente” tanto no cumprimento do acordo de investidura como en “todo aquilo que teña que ver cun trato xusto ás galegas e galegos”, tras 14 anos de subordinación do Goberno galego a Madrid, e reclamou que insistirán en facer o que “non fai” Rueda, “impulsando a axenda galega e defendendo os intereses deste país”. Polo PSdeG, o seu candidato, José Ramón Gómez Besteiro, afirmou que o Goberno estará “100% envorcado coa Galiza” á “marxe da orixe dos ministros”. Díaz, única supervivente de UP da última lexislatura Onde si haberá mudanzas e na parte minoritaria da coalición, na que Sumar substitúe UP, e na que Díaz, líder da agrupación, é a única que mantén o cargo. En Cultura e Sanidade, o primeiro Ministerio será ocupado por Ernest Urtasun, eurodeputado de Catalunya en Comú, e o segundo por Mónica García, voceira de Más Madrid. Choque con Podemos A voceira federal de Izquierda Unida (IU) e eurodeputada, Sira Rego, asumirá Infancia e Xuventude tras a retirada da primeira liña do aínda coordinador federal de IU, Alberto Garzón, ex ministro de Consumo, e Pablo Bustinduy conducirá Dereitos Sociais, Consumo e Axenda 2030. Bustinduy foi deputado por Podemos até 2019, cando marchou da formación durante a escisión de Más Madrid, e a súa chegada á carteira prodúcese logo de rexeitar Podemos que Nacho Álvarez a ocupara logo de ser elixido por Díaz, que se negou a aceptar a continuidade de Irene Montero -ex titular do Ministerio de Igualdade-. Podemos: “Pedro Sánchez e Yolanda Díaz botáronnos do Goberno” Podemos criticou a súa exclusión e a vitoria das “posicións máis conservadoras” na composición do Executivo, definindo como “lamentábel” a permanencia de Marlaska ou Robles e acusando Díaz e Sánchez de “expulsalos” para que o PSOE estea "cómodo" e non haxa presións ao Gabinete "pola esquerda".