Até 26 persoas resultaron feridas de diversa consideración —seis delas en estado grave— por uns feitos que non por surrealistas deixan de ser reais. Un concelleiro de Servidor do Pobo, a formación do presidente ucraíno Volodimir Zelenski, accedeu esta sexta feira ao pleno do Concello de Keretsk, na rexión de Transcarpatia, portando varias granadas ás que retirou o anel para posteriormente ciscar polo chan.
A detonación destas armas provocou unha forte explosión que derivou en importantes danos estruturais e humanos, como se pode apreciar nun vídeo compartido pola Policía de Transcarpatia, que xa puxo o caso en mans do Servizo de Seguridade de Ucraína. O suceso, protagonizado —segundo medios ucraínos— polo edil Serguéi Batrin, está a ser investigado como un posíbel atentado terrorista.
VÍDEO | ‼️O impactante momento no que un concelleiro ucraíno do partido de Zelenski no Concello de Kertesk accede ao pleno municipal e fai explotar varias granadas
👉https://t.co/wJBkuRWHo3 pic.twitter.com/KsgPkXC4Es— Nós Diario (@NosDiario) December 15, 2023![Publicidade 196064]()
O gobernador da rexión, Viktor Mikita, informou de que se están investigando as circunstancias e motivacións deste acto que cualificou como "crime" e que xa se convocou unha reunión de urxencia do Consello de Defensa de Transcarpatia para analizar o suceso e as súas consecuencias. O pleno estaba a retransmitirse en directo pola rede.
Aliás, desde o Ministerio do Interior de Ucraína precisaron que no lugar están traballando desde a mañá desta sexta feira servizos especializados, un grupo de investigación e operativo de policías, expertos en explosivos e criminólogos.
