Ás 9:00 era a hora establecida para comezar as votacións do 1-O. Longas colas e filas de persoas agardaban para exercer o seu dereito a voto naqueles colexios que se mantiñan abertos como puntos de votación. A moitos deles chegaron urnas e papeletas, entre aplausos. Antidisturbios da policía española están despregarse fronte a diversos colexios e xa realizaron cargas, como no colexio onde ten que votar presidente catalán, en Girona; ou en Sabadell e Barcelona.
Axentes das forzas españolas procederon a ocupar o colexio onde tiña que votar Puigdemont, após despexar os centos de concentrados. Un operativo que están a realizar tamén noutros puntos de votación.
Desde a ANC informan que o sistema que empregan para o censo sufriu un ataque e que durante un tempo non se poderá votar. Pinden paciencia.
Defensa
“O dereito a votar gáñase defendendo as escolas”. A xornada de reflexión do 1-O foi unha xornada de festa, compromiso e democracia en moitas escolas e institutos cataláns, ocupados por veciños e veciñas para que este domingo poidan ser colexios electorais, desobedecendo así o ‘diktat’ do Estado español. Unha insubmisión cidadá coas escolas como protagonistas. Os Mossos están a pasar desde as 6:00 por estes colexios, a onde cada vez chega máis xente para defender o dereito a votar. Os Mossos levantan acta da situación e adveren que os locais deben, por orde da xustiza española, ficar baleiros ás 6:00 horas do domingo. En diversos medios recóllese unha circular deste corpo no que se indica que os Mossos, se a esa hora atopan xente nos colexios, absteranse de actuar se as persoas ocupantes se negan a marchar. Escoles Obertas cifra en 1.134 os colexios ocupados.
Censo universal
Haberá censo universal para garantir o voto embora se fechen colexios. É dicir, que as persoas poidan acudir a votar a calquera centro de votación. Falta por confirmar se o censo universal será só para as persoas que atopen o seu punto de votación fechado ou para todas.
O portavoz da Generalitat, Jordi Turull, deu a noticia. "Haberá un duplo check de comprobación para que non se poidan repetir os votos".
Tamén anunciou que, por mor da incautación de sobres, poderase votar sen eles, e que valerán as papeletas imprimidas na casa. Un grupo de académicos, dixo, encargaranse de velar e supervisar o desenvolvemento do refrendo.
Implicación
Alumnos, nais e pais, asociacións cidadás, colectivos sociais, activistas e militantes, veciñanza... Un amplo colectivo de miles de persoas participan nesta fin de semana en impulsar numerosas actividades en diferentes centros educativos para mantelos ocupados até o domingo e, así, evitar que poidan ser precintados pola policía, que ten orde de impedir que se vote.
O temor é que isto dea pé a que interveñan os miles de policías españois e gardas civís mobilizados desde diferentes lugares do estado e que agardan no Porto de Barcelona a orde para actuar.