Sexta noite de protestas en Francia após o asasinato dun mozo de 17 anos, Nahel, a mans dun policía. O último balance do Ministerio do Interior apunta 157 novas detencións ao longo desta madrugada, 20 delas en París e os seus arrabaldes, así como unn total de 352 incendios na vía pública. Un bombeiro faleceu nos labores de extinción no barrio parisino de Saint-Denis.
A do domingo á segunda feira, foi, con todo, unha noite relativamente tranquila, pois na xornada anterior foran detidas máis de 700 persoas e na noite da sexta feira, máis de 1.000. O balance ascende desde que comezaron os disturbios hai case unha semana a arredor de 3.000 detencións e uns 45.000 axentes policiais despregados nas rúas polo Goberno, así como varios vehículos blindados.
O presidente, Emmanuel Macron, recibirá esta segunda feira os presidentes do Senado, Gérard Larcher, e a Asemblea Nacional, Yaël Braun-Pivet, mentres a primeira ministra, Elisabeth Borne, manterá un encontro cos portavoces dos diferentes grupos parlamentarios, "nunha lóxica de intercambios" a fin de analizar a tensa situación que se está a vivir en moitas cidades do país.
E na terza feira Macron reunirase no Elíseo cos rexedores dos máis de 220 municipios afectados polas protestas. Precisamente os alcaldes de Francia convocaron fronte a todos os consistorios senllas "mobilizacións cívicas" hoxe, a partir das 12 horas, após o violento ataque no domicilio do alcalde de L'Haÿ Les Roses —ao sur de París—, Vincent Jeanbrun, contra o que empotraron un vehículo en chamas.
A avoa do mozo falecido afirmou, en declaracións á canle BFM, que "confía" na Xustiza e lamentou que haxa quen utilice o "pretexto" da tráxica morte de Nahel para "vandalizar escolas e vehículos". "Quero o policía que matou o meu neto, é todo o que quero. Pido á xente que está a destrozalo todo que pare", dixo.
Aliás, medio centenar de radicais de extrema dereita, vestidos de negro e coas caras tapadas, irromperon nas rúas de La Guillotière, en Lyon, ao berro de "On est chez nous" —"Estamos en casa"— e causaron disturbios, polo que foron dispersados pola Policía con gases lacrimóxenos.
Plus de 80 militants d’extrême-droite peuvent partir, armés, en « ratonnade » depuis leur local (situé 5 montée du change dans le Vieux-Lyon). Et ça fait 10 ans que ça dure…
— Raphaël Arnault (@ArnaultRaphael) July 2, 2023
Il faut stopper ça et commence par fermer leur local ! pic.twitter.com/J6SWy0muxP