Israel deixa sen fogar 700 palestinos no que vai de ano

A Axencia das Nacións Unidas para os Refuxiados Palestinos en Oriente Medio (UNRWA nas súas siglas en inglés) denuncia que no que vai de ano máis de 700 palestinos foron desprazados debido ás demolicións masivas perpetradas por Israel en Cisxordania. A magnitude é tal que a cifra xa se aproxima ao número total de persoas desprazadas en todo o 2015.

As zonas máis afectadas polas demolicións son Xerusalén, Ramala e Belén. A Administración israelí acomete estes despexos escudándose na falta de permisos para construír vivendas, moitas delas entregadas a través de doazóns.

nun só día –a pasada quinta feira-, Israel deixou sen casa 124 persoas, das que 60 eran crianzas. Trátase dunha nova medida de acoso do réxime sionista ao pobo palestino.

A axencia da ONU amosou a súa preocupación polas demolicións, na medida en que viola o Cuarto Convenio de Xenebra, que impide a destrución da propiedade privada.