O imperialismo interseccional

Na actualidade enfrontámonos a un imperialismo interseccional que, ao mesmo tempo que produce e reproduce múltiples e heteroxéneas xerarquías de dominación a escala global que oprimen tanto a humanidade como a natureza (incluíndo o patriarcado da cristiandade), desprega toda unha retórica antipatriarcal, antirracista, antiecocida e mesmo anticapitalista como estratexia perversa de disuasión, división e silenciamento dos movementos críticos antiimperialistas. O Usaid, a Axencia dos Estados Unidos para o Desenvolvemento Internacional, para o financiamento das embaixadas estadounidenses no mundo, busca financiar Organizacións Non Gobernamentais (ONG), grupos e movementos que son ecoloxistas, feministas, LGBT, antiracistas, e ata anticapitalistas e descoloniais, sempre que non sexan antiimperialistas, e limítanse a loitar por demandas particulares e fragmentadas de cada grupo oprimido buscando reivindicacións dentro do sistema e nunca contra o sistema. O asunto é perverso, o mesmo sistema imperialista responsábel de producir e reproducir a multiplicidade de opresións, á súa vez financia os grupos reformistas e identitaristas que se opoñen a estas opresións sempre que non representen ningunha ameaza antisistémica e sempre que non se limiten a demandas particularistas sen conexión nin solidariedade con outros grupos oprimidos. Relacións de dominación As esquerdas do século XXI carecen de suficientes criterios como para reflexionar criticamente sobre os casos nos que o imperio utiliza discursos interseccionais para descualificar figuras claves dos movementos de esquerda, antiimperialistas e decoloniais en momentos chave das loitas. O golpe de Estado contra Evo Morales en Bolivia no 2019 é un caso emblemático. O imperio usou grupos ecoloxistas e feministas financiados pola Usaid e por fundacións da CIA para, no medio dun golpe de Estado imperialista e racista, atacar a Evo como "machista" e como o responsábel "ecocida" dos incendios nas Amazonas aínda que é de todos coñecido que foron as políticas de Jair Bolsonaro as responsábeis de ditos incendios. Outro exemplo é o financiamento de ONG ambientalistas que produciron e sostiveron o candidato de nome Yaku nas eleccións ecuatorianas. Este candidato de rostro indíxena favorecido por Washington, usando un programa ecoloxista de "esquerda" dividiu o voto da esquerda permitindo o ascenso e triunfo do branco oligarca, neoliberal e banqueiro Lasso. Lasso, durante a campaña electoral, dixo que era un grande admirador do xenocida, paramilitar e ex presidente colombiano Álvaro Uribe Velez. Hoxe Lasso non só deu un golpe de Estado senón que instaurou o paramilitarismo en Ecuador asasinando cidadáns a diario. O imperio non dubidará en adoptar a aparencia dunha vítima perfecta para seguir exercendo dominio Neste sentido, debemos ter en conta que o imperio estuda de maneira sistemática as posicións críticas ao seu sistema de dominación para adaptarse e moldearse a si mesmo neutralizando e dividindo os grupos que se lle opoñen. Por tanto, non podemos ser inxenuos, isto é, non debemos deixar aberta ningunha fenda ao imperio, que onte tiña cara de lobo, pero hoxe tena de ovella. O imperio non dubidará en adoptar a aparencia dunha vítima perfecta para seguir exercendo dominio, e isto é algo que debemos ter en conta. O imperio non só tolera, senón que tamén fomenta e financia colectivos e movementos feministas, antirracistas, ecoloxistas, decoloniais e mesmo até anticapitalistas, a condición de que non sexan antiimperialistas. Utiliza a loita de todas estas identidades como mecanismos perversos de dominación e opresión para dividir e vencer os movementos populares que se lle opoñen. Noutras palabras, o mesmo sistema que é responsábel de xerar as relacións de dominación múltiples que enfronta a humanidade, o sistema imperialista mundial, é o mesmo que financia as ONG e grupos políticos críticos que combaten certas xerarquías de dominación. Con que obxectivo? Para asegurarse de que as loitas contra esas xerarquías de dominación non se convertan en loitas antiimperialistas, é dicir, antisistémicas. Loita contra a opresión Hoxe en día existen feministas pro-imperiais, ecoloxistas pro-imperiais, decoloniais imperiais, etc., cuxas organizacións, en moitos casos, están a ser financiadas polo imperio. Ante un imperialismo interseccional, debemos asegurarnos de que as loitas contra as opresións múltiples, tales como as loitas feministas, as ecoloxistas, as decoloniais, as socialistas, as LGBT, etc. sexan antiimperialistas e solidarias con todos os grupos oprimidos.