40 sindicatos de Sri Lanka organizaron a cuarta feira unha folga xeral que tivo un seguimento masivo segundo refiren os medios locais, e que obrigou a fechar a maioría das sedes bancarias do país, portos e até algúns hospitais.
As protestas exixen a fin das medidas reclamadas polo Fondo Monetario Internacional (FMI) para outorgar un préstamo de 2.700 millóns de euros que axude a conter unha inflación de 50,6% e superar unha bancarrota que o presidente Ranil Wickremesinghe adianta se estenderá até 2026.
Estas medidas inclúen unha suba do prezo da electricidade de 66%, unha alza dos impostos sobre a renda e unha redución xeral do gasto público, no marco dunha crise que disparou os prezos e provocou desabastecemento de alimentos, medicinas ou combustíbel, así como apagadas periódicas de electricidade, e que xa xerou mobilizacións multitudinarias que obrigaron o ex presidente Gotabaya Rajapaksa a renunciar en 2022.
“Estamos protestando porque nos custa vivir”, explicou Niroshan Gorakanage, da Alianza Sindical de Portos, que incidiu en que “este Proxecto de lei do imposto sobre a renda debe ser eliminado ou imos garantir que haxa máis problemas para este Goberno”.
Os líderes sindicais trasladaron que o mandatario lles confirmou o sábado que non dará marcha atrás no aumento deste imposto, recoñecendo que é unha das condicións do FMI para entregar os cartos. As múltiples protestas que se desenvolveron no país se efectuaron a pesar do incremento da represión por parte do Goberno de Wickremesinghe, que a terza feira chegou a prohibir as folgas no sector público e ameazar con despedir as persoas funcionarias que non se presentaran onte no seu posto de traballo.
A pesar do éxito da folga, non é a única manifestación que decorreu nos últimos meses, coas protestas intensificándose en paralelo á represión.
O pasado domingo, unha protesta pacífica en contra da suspensión das eleccións locais, ao negarse o Executivo a dotar o órgano electoral dos fondos necesarios esgrimindo a crise económica no país, acabou coa morte dunha persoa a mans da Policía, xunta ducias de persoas hospitalizadas.
Amnistía Internacional fixo fincapé en que as accións policiais “custaron durante os últimos meses a vida de moitos manifestantes pacíficos”, e solicitou “investigacións independentes e imparciais sobre todas as denuncias de violacións dos dereitos humanos”.