Un acto ateigado de referencias históricas arredor da Revolución marcou a festa polo 90 aniversario de Fidel Castro, que contou coa interpretación da cantante Omara Portuondo, os relatos do historiador Eusebio Leal Spengler, coa actuación do grupo de teatro infantil La colmenita e coa proxección de fragmentos do documentario Mi hermano Fidel.
Acompañaron o líder cubano o seu irmán, presidente do país, Raúl Castro, e o homólogo deste en Venezuela, Nicolás Maduro. Aliás, o acto de conmemoración do nacemento de Fidel contou coa presenza de numerosos revolucionarios que participaron no asalto ao cuartel Moncada, así como un amplo abano de representantes da sociedade civil e militar cubana.
Ao berro de Viva Fidel, Viva Cuba sumáronse as mostras de afecto ao ex mandatario, que agradeceu as felicitacións. “Desexo expresar a miña máis fonda gratitude polas mostras de respecto, os saúdos e os obsequios que recibín estes días”.