As enquisas sinalan unha tendencia á baixa do PP e afastan Feixoo do Executivo español

Esta noite comezou de forma oficial o período de campaña electoral correspondente ás eleccións estatais ao Congreso e ao Senado españois. En consecuencia, as forzas políticas que se presentan aos comicios do próximo 23 de xullo nas diferentes circunscricións procederon na esta noite a realizar a tradicional pegada de carteis. Pontón ve "posíbel" un grupo con deputados das catro circunscricións O actual presidente do Executivo español e candidato do PSOE a revalidar o liderado do Goberno, Pedro Sánchez, parte como segunda forza nas enquisas. Desta forma, os estudos electorais divulgados nas últimas horas por parte de diversos medios privados outorgan ao socialista un resultado de entre os 106 e o 109 escanos. Porén, os resultados que lle outorga o último barómetro do Centro de Investigación Sociolóxicas (CIS), publicado esta terza feira, presentan un panorama máis favorábel para o líder socialista, pois alcanzaría entre os 115 e os 135 escanos no Congreso. Para alcanzar a maioría absoluta no congreso son precisos 176 votos Así é todo, nun arco parlamentario de 350 deputados e deputadas, os apoios de Sánchez ficarían lonxe da maioría absoluta, que se sitúa nos 176 escanos. Ademais, o 23 de xullo, cada circunscrición electoral escollerá catro representantes para o Senado, que xunto aos de designación autonómica, completarán os 266 asentos. O Senado español está composto por un total de 266 representantes O PP, o principal partido da oposición no Estado español, actualmente liderado por Alberto Núñez Feixoo, parte nas enquisas como favorito a ser a primeira forza. As últimas sondaxes privadas indican que obtería entre 136 e 152 escanos. Porén, o apoio que obtería segundo o barómetro do CIS sería algo menor, de entre 122 e 140 asentos no Congreso español. En ambos os casos, Núñez Feixoo precisaría do apoio da ultradereita de Vox, liderada por Santiago Abascal, para ter posibilidades de optar a liderar o Goberno. De non ser suficiente cos de Abascal, o PP tería complicado obter outros apoios. Aínda así, as enquisas non deixan un panorama claro, e a gobernabilidade do Estado español semella moi disputada. Porén, unha cousa parece bastante clara, o feito de que o próximo Executivo volverá ser de coalición. Todo indica que para revalidar o Goberno, o actual líder do Executivo español precisaría os apoios de Sumar, a nova forza política liderada pola actual ministra de Traballo, Yolanda Díaz, así como das outras forzas, como as soberanistas e rexionalistas. No caso de Sumar, as últimas enquisas sinalan que entraría no arco parlamentario español cunha forza de entre 28 e 32 deputados, por debaixo dos 38 que até o de agora sumaban algunhas das forzas integradas nesta plataforma electoral como Unidas Podemos, Más País e Compromís. Porén, no caso do CIS, o resultado de Díaz elévase a entre 43 e 50 asentos. Pola súa parte, Vox alcanza nas últimas sondaxes unha suma de entre 31 e 39 escanos, tamén por baixo dos 53 asentos que tiña até o de agora no Congreso. No caso do barómetro do CIS, os de Abascal alcanzan un resultado aínda peor, pois descenderían a entre 21 e 29 representantes. Desta forma, a maioría das enquisas que se deron a coñecer esta quinta feira sinalan que a suma de PP e Vox alcanzaría entre 175 e 176 escanos, polo que a maioría absoluta destas dúas forzas estaría completamente no limiar. Un escenario similar ao que experimentan o conxunto das forzas políticas que se marcan como obxectivo frear a entrada da ultradereita no Executivo español. Por outra parte, o CIS sitúa moito máis complicada unha eventual suma de PP e Vox para alcanzar un Goberno conxunto, xa que o barómetro da institución outorga a estas dúas forzas políticas un resultado conxunto na contorna dos 155 deputados. Apertura da campaña Sánchez comezou esta quinta feira a campaña en Madrid no pavillón de convencións da Casa de Campo xunto á ministra para a Transición Ecolóxica e o Reto Demográfica e número dous por Madrid Teresa Rivera e o líder da forza socialista na Comunidade de Madrid, Juan Lobato. A campaña electoral, con 23 escanos en disputa na Galiza, arranca esta medianoite Logo dun acto nos Peares (A Peroxa) onde se encontrou coa súa familia, Feixoo desprazouse a Castelldefels (Catalunya) para participar na pegada de carteis. Será a súa terceira visita a Catalunya nos últimos dez días e volverá a próxima semana a Barcelona para o acto central de campaña, segundo fontes do PP. Díaz elixiu Galiza, e nomeadamente A Coruña, para arrincar a campaña electoral e fíxoo acompañada da ex alcaldesa de Barcelona, Ada Colau, coa que participará na tradicional pegada de carteis que dá o disparo de saída da carreira cara ás urnas. Vox abrirá a campaña oficialmente hoxe en Valladolid, aínda que esta feira Abascal participou nun acto en Almería, onde realizou simbólica pegada de carteis. Frear a ultradereita A posíbel chegada da ultradereita ao Consello de Ministros e Ministras do Estado español no caso de que PP e Vox sumen os escanos suficientes para chegar á maioría absoluta é unha das claves que marcarán a campaña electoral. As consignas dos de Abascal contra o feminismo, o aborto, a inmigración ou as políticas a prol da liberdade sexual xeran medo entre amplos sectores da cidadanía. Neste contexto, parece moi difícil que os dous partidos da dereita e da ultradereita españolista consigan máis apoios para conseguir que unha potencial investidura de Feixoo puidese saír adiante. Pola contra, si semella máis plausíbel a unión do resto de forzas políticas para frear a ultradereita no caso de que estas sumen os 176 votos necesarios no Congreso. As forzas soberanistas aspiran a ser imprescindíbeis na gobernabilidade A s forzas políticas soberanistas das distintas nacións sen Estado xogan un papel moi importante nas actuais eleccións estatais, pois aspiran a funcionar como dique para a chegada da suma de PP e Vox ao Goberno, mais tamén a ser imprescindíbeis para conseguir defender os intereses e os dereitos nacionais da Galiza, de Euskal Herria e de Catalunya. Yolanda Díaz arrincará a campaña de Sumar na Coruña con Ada Colau Representantes das distintas opcións políticas das nacións sen Estado xa sinalaron que non "regalarán" o seu voto, polo que no caso de dar as contas para que Sánchez revalide a súa posición como líder do Executivo, este verase obrigado a negociar o respaldo con estas forzas e atender as súas demandas. Na Galiza, o BNG ve estas eleccións como “unha grande oportunidade para que a Galiza se faga valer ante o Estado e pór fin a tanta discriminación”. O CIS sinala que os nacionalistas galegos duplicarán o voto e obterán até tres escanos. Porén, o BNG aspira a conseguir "un grupo orgullosamente galego". En Euskadi, son dúas as formacións soberanistas que concorren. O PNV obtén no CIS entre tres e cinco asentos, ao bordo de perder o grupo parlamentario. EH-Bildu situaríase como a forza que sería máis votada e conseguiría entre catro e sete escanos. En Catalunya, ERC mantería con seguridade o grupo parlamentario, aínda que perdería a metade representantes até quedar entre cinco e sete. Junts loitaría por ter grupo, cunha representación entre tres e seis asentos. Pola súa parte, as CUP xóganse a presenza no Parlamento, aspirando a un escano.