A decadencia do imperio dos EUA e o seu perigo para o mundo

Ningún imperio é eterno. Todos teñen o seu ascenso e descenso até a súa desaparición co colapso final. O imperio estadounidense non é excepción. Está en crise terminal. A débeda do Goberno federal estadounidense é a máis grande entre todos os gobernos do mundo cun total de 31,4 trillóns de dólares. Esta é unha débeda impagábel. A maior parte é produto dos gastos militares en guerras inútiles para beneficiar unhas poucas compañías do complexo militar-industrial dos Estados Unidos (EUA). Aí van tamén varios trillóns de dólares de diñeiro público que pasou das arcas do Goberno aos bancos e aos capitais transnacionais durante a crise de 2008-2009 e a crise da Covid. Xapón e China son os países a quen máis deben os EUA. A débeda dos fogares está nuns 17 trillóns de dólares. Gran parte dos cidadáns estadounidenses viven endebedados tanto con hipotecas sobre as súas vivendas como con tarxetas de crédito que sosteñen o consumo desmedido. Na crise de 2008-2009 uns 12 millóns de familias perderon as súas casas porque non podían pagar as hipotecas. Asumindo unha familia de catro persoas, son 48 millóns de cidadáns os que perderon as súas casas. No colapso financeiro que se aveciña espérase que estes números sexan aínda maiores. Declive do dólar O mercado mundial desdolarízase aceleradamente. A porcentaxe das reservas dos bancos centrais hai 20 anos era de 72% en dólares, hoxe está en 58%. A partir da guerra de Ucraína, o bloque dos Brics encabezado por China e Rusia de maneira consciente e planificada aceleraron a caída do dólar. Este bloque busca escapar das sancións arbitrarias impostas polo imperio usando outras moedas para o seu intercambio no mercado mundial. O dólar segue sendo importante pero está a perder protagonismo nos mercados mundiais ante o ascenso doutras moedas. O dólar non está sostido en ouro. Desde que en 1971 saíu do seu patrón e o seu valor depende de ser a moeda máis usada no comercio internacional. Na medida en que o dólar perde protagonismo no mercado mundial, convértese en puro papel sen ningún valor. En cambio, o rublo (Rusia) e o renminbi (China) están baseadas no patrón ouro, o cal lles dá unha vantaxe sobre o dólar. Isto dá garantías que o dólar non ofrece. A impresión desmedida de papel dólar para os EUA pagar as súas débedas, está a devaluar aceleradamente o valor do dólar. A maior impresión de papel dólar sen ser sostido en ouro, maior aceleración da súa decadencia. Forza militar Militarmente falando, aínda que Estados Unidos destruíu varios países, non gañou ningunha das guerras dos últimos 20 anos. O seu poderío militar non foi suficiente para gañarlle a un exército de soldados en sandalias e sen armas poderosas como os Talibán en Afganistán. Tampouco gañaron en Siria e Iraq. Se á desvalorización do dólar lle sumamos a alza en petróleo e gas no mundo a partir da guerra de Ucraína, os traballadores estadounidenses comezan a sentir e a sufrir hiperinflación. Ante a ausencia dunha esquerda nos EUA, a profundización da crise económica que se vive alí está a provocar un ascenso vertixinoso da extrema dereita. Agora mesmo o país está dividido metade e metade entre forzas fascistas e forzas demócratas de dereita. Avance do neofascismo A dereitización da poboación nos EUA ten o potencial de desembocar nunha guerra civil O fenómeno da alza da dereitización vémolo tamén en Europa. Pero nos EUA dáse cunha particularidade. Analistas importantes chaman a atención sobre que a dereitización da poboación nos EUA ten o potencial de desembocar nunha guerra civil. O feito de que as armas non estean controladas e de que haxa milicias cidadás supremacistas brancas organizadas militarmente, como vimos ante o asalto trumpista ao Congreso en Washington o 6 de xaneiro de 2021, fai que o descontento popular poida terminar nunha guerra civil. Moitas destas milicias supremacistas brancas, ao ver perdido o seu control sobre o Goberno federal, puidesen nunha crise pedir a independencia dos estados para non pagar a débeda trillonaria do Executivo. Isto ten un só destino: se EUA entrase nunha guerra civil implosionaría como imperio desmembrándose en varios países. Esta implosión como país vímola nos anos oitenta na Unión Soviética. Non deberiamos estar sorprendidos se o mesmo pasase nos EUA. Pero o perigoso é que sendo o país con máis armas nucleares a escala mundial, que faría nun acto desesperado un líder demagogo e carismático de corte neofascista se vise que o seu imperio caerlle enriba ante o ascenso doutras potencias emerxentes? Dubidaría en voar o mundo? Non quero soar apocalíptico, pero non esaxero se lles digo que isto é unha posibilidade real na segunda metade desta década.