A China e os Estados Unidos acordan estabilizar a súa relación bilateral

Na última xornada da súa visita oficial de dous días á China, Antony Blinken, secretario de Estado estadounidense, reuniuse a segunda feira durante 35 minutos co presidente chinés, Xi Jinping, nunha xuntanza que non estaba programada inicialmente e tras un encontro de arredor de tres horas de Blinken con Wang Yi, o xefe da diplomacia do Partido Comunista da China. “A parte chinesa deixou clara a nosa posición, e as dúas partes acordaron seguir adiante co entendemento común que o presidente [dos Estados Unidos] Biden e eu alcanzamos en Balí”, apuntou Xi, en referencia á reunión entre os mandatarios estadounidense e chinés en novembro de 2022 en Balí, Indonesia, na cimeira do G20, na que pactaron manter unha comunicación bilateral máis frecuente. Amais, indicou que “tamén se alcanzaron avances e se chegou a acordos sobre algúns temas específicos”, afirmando que “agardo que a través desta visita fagan contribucións máis positivas para estabilizar as relacións entre a China e os Estados Unidos (EUA)”, ao que Blinken contestou que “Washington está comprometido” a “xestionar a nosa relación”, definindo as conversas coas autoridades chinesas como “francas e construtivas”. Así e todo, o titular do Departamento de Estado de Washington sostivo que Beijing rexeitou reactivar as canles de comunicación directa entre ambos os dous Exércitos, o que para os EUA era unha prioridade, a pesar de propolo “repetidamente”. Deste modo, os dous países consideraron positiva a visita ao reactivar unhas relacións bilaterais que o ministro de Relacións Exteriores chinés, Qin Gang, considerou que se atopan no “punto máis baixo desde o estabelecemento de relacións diplomáticas” en 1979. Nese sentido, Blinken converteuse no funcionario de máis nivel de Washington en visitar a China desde 2018. Aliás, é a súa primeira viaxe ao país desde que chegou ao posto en 2021, tras ser nomeado por Biden. Wu Xinbo, director do Centro de Estudos Estadounidenses da Universidade de Fudan, en Shanghai, explicou a Reuters que “a mensaxe da China foi bastante positiva”, ao amosar que “aínda agarda traballar con Washington para estabilizar e mellorar as relacións, creo que malia que a China non é optimista sobre as relacións sino-estadounidenses tampouco perdeu a esperanza”. Por iso, “agárdase que a visita [de Blinken] marque o comezo dunha nova rolda de visitas de altos funcionarios estadounidenses e chineses, que posibelmente inclúa unha reunión entre Xi e Biden nos próximos meses”, salienta AP. Especialmente após a suspensión da visita de Blinken ao país asiático en febreiro pola polémica arredor dun globo chinés atopado sobrevoando os EUA que finalmente foi derribado polos militares americanos entre acusacións de espionaxe, mentres que a China defendeu que se trataba dun globo meteorolóxico. Wang atribuíu aos EUA a responsabilidade de frear “o declive” das relacións mutuas, exixindo que “deixen de esaxerar a teoría da ameaza da China, levanten as sancións unilaterais contra a China, abandonen o intento de suprimir o desenvolvemento tecnolóxico da China e se absteñan de interferir arbitrariamente nos asuntos internos chineses”. Estas declaracións prodúcense pouco despois de que Washington aprobara sancionar 31 organizacións da China na liña dos paquetes de sancións impulsados para frear o desenvolvemento de sectores no país como o dos microchips, semicondutores, intelixencia artificial ou supercomputación, en paralelo ao veto cada vez maior a empresas como TikTok, todo baixo a xustificación de garantir a súa seguridade nacional e obstaculizar o desenvolvemento militar chinés. Ao tempo, os EUA premen os seus aliados, como a Unión Europea, para que apliquen restricións semellantes. En todo caso, Blinken puxo o foco na “importancia de xestionar de forma responsábel a competencia entre os EUA e a China a través de canles abertas de comunicación para garantir que a competencia non se converta en conflito”. Futuro da humanidade “O futuro e o destino da humanidade dependen de se a China e os EUA poden coexistir”, recalcou Xi ante Blinken, debullando que o país “respecta os intereses dos EUA e non desafiará nin substituirá os EUA. De maneira similar, os EUA tamén debe respectar a China e non danar os dereitos e intereses lexítimos da China”, e resolveu que “ningunha das partes pode moldear a outra en base aos seus propios desexos e moito menos privala do seu lexítimo dereito ao desenvolvemento”. Pola súa parte e segundo o comunicado das autoridades chinesas, Blinken recalcou que non buscan unha nova Guerra Fría, mudar o sistema chinés ou que o fortalecemento das súas alianzas implique unha oposición a Beijing, a pesar de que ese é o obxectivo detrás do pacto Aukus co Reino Unido e Australia ou da reorientación das súas capacidades militares cara ao Indo-Pacífico, sosteñen medios estadounidenses. Beijing insta os EUA a elixir entre conflito ou cooperación Para estabilizar as relacións bilaterais, Wang chamou os EUA a “elixir entre o diálogo e a confrontación, a cooperación e o conflito”. Ademais da política estadounidense contra o sector tecnolóxico chinés, marcado por sancións ás que a China replica reciprocamente, Taiwán é o principal punto de discordia entre os dous Estados. Blinken reiterou que os EUA “non apoian a independencia de Taiwán”, considerada unha liña vermella por parte de Beijing, porén, Washington é o maior provedor de armas de Taipei e o presidente Biden chegou a asegurar que defenderían a illa en caso dunha operación militar chinesa, un extremo que á vez Beijing non descarta para reunificar o país. Ao respecto de Taiwán “a China non ten espazo para compromisos ou concesións”, concluíu Wang. Xira pola UE Li Qiang, primeiro ministro chinés, está esta semana de xira por Alemaña e Francia na súa primeira viaxe internacional. O Global Times recolle que a chegada de Li pretende estreitar lazos cos membros da UE, no medio dos debates no bloque comunitario sobre se asumir a posición arredor da China que promoven os EUA, o que foi cuestionado por países como Francia, que defenden a autonomía estratéxica da UE.