Biden racha a reactivación dos lazos coa China 24 horas despois do acordo

As declaracións do presidente dos Estados Unidos, Joe Biden, foron “extremadamente absurdas” e “irresponsábeis”, ademais de constituír “unha provocación política aberta”, incidiu a cuarta feira a voceira do Ministerio de Relacións Exteriores chinés, Mao Ning, horas despois de que Biden cualificara o presidente chinés, Xi Jinping, de ditador. En paralelo, Mao recalcou que a intervención do mandatario americano “violou gravemente a dignidade política da China”, así como o “protocolo diplomático”. Os comentarios de Biden producíronse nunha recadación de fondos para o Partido Demócrata en California, na que afirmou que “a razón pola que Xi se molestou moito cando derribei ese globo con dous furgóns cheos de equipo de espionaxe foi que non sabía que estaba alí”, en alusión a un globo chinés que foi descuberto en febreiro, e que Beijing defendeu que se trataba dun instrumento meteorolóxico. O presidente estadounidense engadiu que “esa é unha gran vergoña para os ditadores, cando non saben o que pasou, non se supuña que ese fora o lugar onde debía estar, desviouse do rumbo”, sostivo. En todo caso, as declaracións de Biden, apenas un día despois de que o secretario de Estado estadounidense, Antony Blinken, rematara a súa visita á China, poñen en cuestión o acordo entre Washington e Beijing para estabilizar a súa relación bilateral a comezos desta semana. O propio Blinken considerou o capítulo do globo fechado a segunda feira, após atrasar a visita á China programada en febreiro por mor da aparición do aeróstato. O director do Centro de Estudos Estadounidenses da Universidade de Fudan en Shanghai, Wu Xinbo, explicou a Reuters que a importancia da “confianza mutua é no que a China estivo a facer énfase, polo que os comentarios de Biden son moi destrutivos e daniños”. Así e todo, amosouse confiado en que as declaracións non desfagan completamente os logros da visita de Blinken, que decorreu cando as relacións bilaterais estaban no seu peor momento segundo Beijing. O director xeral do Departamento de Asuntos de América do Norte e Oceanía do Ministerio de Relacións Exteriores da China, Yang Tao, afirmara ao Global Times antes da intervención de Biden que están “dispostos a levar a cabo unha comunicación e un diálogo construtivos cun espírito de respecto mutuo, e a parte estadounidense tamén debe amosar sinceridade e tomar medidas”. Asemade, o propio Biden defendeu a segunda feira que consideraba que as relacións coa China estaban camiño de mellorar, e a terza anunciou que o enviado para asuntos vinculados co cambio climático de Washington, John Kerry, se desprazaría pronto ao país asiático. Este asunto xa foi abordado na xuntanza entre Xi e Biden en novembro do pasado ano, na que o presidente chinés fixo fincapé en que contan cunha “democracia ao estilo chinés”. Ao tempo, Dmitri Peskov, voceiro do Kremlin, describiu como “errática” a política exterior dos Estados Unidos e “incomprensíbeis” as palabras de Biden, afirmando que “son manifestacións moi contraditorias da súa política exterior que falan dun grande elemento de imprevisibilidade”, resolvendo que “porén, ese é o seu negocio”. Hunter Biden, pendente da maxistratura As declaracións de Biden sobre a China chegaron logo de que poucas horas antes se fixera público un acordo entre o seu fillo, Hunter Biden, e o Departamento de Xustiza, para que se declare culpábel de tres delitos, dous menores de fraude fiscal por non pagar máis de 180.000 euros en impostos federais sobre a renda en 2017 e 2018 e un grave de posesión ilegal dunha arma de fogo como usuario de drogas. A cambio, o Departamento recomendará a un xuíz federal, que ten a última palabra, que non entre en prisión e non o imputará polo último cargo se Biden renuncia a ter unha arma de fogo no futuro e se mantén afastado das drogas durante dous anos. “Aínda que non é de todo inaudito”, admite AP, “é pouco usual resolver un caso federal ao mesmo tempo que se presentan os cargos no tribunal”. O presidente da Cámara de Representantes, o republicano Kevin McCarthy, insistiu en que isto amosa “a dobre vara de medir” da Xustiza estadounidense, comparándoo coas acusacións federais das que foi obxecto o ex presidente entre 2017 e 2021, Donald Trump. Aínda que o xuíz federal acabe por aceptar o acordo, que chega tras unha investigación de cinco anos, McCarthy ratificou que proseguirán as pescudas sobre os negocios de Hunter Biden no Congreso impulsadas pola maioría republicana na Cámara baixa. Os ingresos de Hunter Biden proviñan neste período de Burisma, a principal empresa privada ucraína de gas natural, de cuxa xunta directiva formou parte entre 2014 e 2019, á vez, o actual presidente estadounidense ocupaba a vicepresidencia no mandato de Barack Obama entre 2009 e 2017. O propio Hunter Biden chegou a recoñecer que a empresa ucraína vía o seu nome como “ouro” á hora de contratalo. Nese sentido, a Cámara de Representantes investiga o mandatario pola revelación dunha fonte da Axencia Federal de Investigación (FBI) de que os Biden recibiron máis de catro millóns e medio de dólares cada un de parte dun alto executivo de Burisma, un pago que a fonte explicou como un “anticipo” para que Joe Biden arranxase unha serie de problemas cando o fiscal xeral ucraíno Viktor Shokin investigaba a compañía por corrupción. Como vicepresidente, Biden ameazou cun corte na axuda económica a Ucraína no caso de que non destituíse a Shokin, acusándoo de corrupción, antes de gabarse do éxito da presión a Kíiv. James Comer, presidente do Comité de Supervisión e Responsabilidade da Cámara baixa, acusou pai e fillo de participar nun “esquema criminal de subornos”. Un caso fóra do "radar" da poboación Malia que só un de cada tres demócratas nos Estados Unidos quere que o presidente Biden se presente á reelección segundo as enquisas, medios locais descartan que os cargos demócratas con máis posibilidades de competirlle a candidatura se presenten a raíz da declaración de culpabilidade do seu fillo, que de forma previsíbel será citada polos republicanos durante a campaña. Stephanie Cutter, estratega do Partido Demócrata, aseverou que a acusación contra Hunter Biden “non está no radar da maioría dos estadounidenses”.