"Eu non son moi amiga das teorías conspiratorias, mais xa hai quen di con forza que detrás do 15-M está a dereita". Díxoo a secretaria xeral da 'Unión Internacional de Jóvenes Socialistas', Beatriz Talegón, nunha entrevista concedida hai uns meses a unha cadea de radio arxentina e que as redes sociais se encargaron de traer até a actualidade esta fin de semana facendo circular un vídeo coa gravación de Radio Hache.
Talegón, que amaga con se presentar ás primarias do PSOE, analiza nesta conversa o panorama político no Estado español e arremete contra o movemento indignado ao acusalo de ser responsábel "de lle pór en bandexa o poder ao capital e ao sistema neoliberal". Di que ela propia fixo parte das asembleias que se convocaron nas prazas en 2011. Malia recoñecer que "non lles falta razón no que din" quéixase de que o berro sexa "contra todo" e acrecenta que o 15-M "moveu a xente a non votar abrindo a porta á dereita a que arrase con todos os dereitos sociais conquistados".
Unha das proclamas deste movemento era a modificación da lei electoral e do sistema D'Hont para evitar o bipartidismo PP-PSOE. A respecto desta cuestión Talegón non di nada. Limítase a subliñar que "algúns xa o diciamos daquela" (en referencia ás primeiras asembleias do 15-M) e "eu xa vía cousas que me preocupaban", proclama a lexitimidade dos "actores sociais que son os partidos políticos" e insiste en que foi a dereita quen "manexou" o descontento da cidadanía concentrada nas prazas para a convencer de que a solución era non ir votar.
"Iso é poñer o poder en bandexa aos grupos de dereitas máis radicais ou de gobernos tecnócratas, como aconteceu en Grecia", comenta Talegón, fuxindo de calquera crítica ao seu partido, o PSOE, malia que o 15-M chamou tamén a depositar na urna a pepeleta das forzas políticas de esquerdas que non fosen a formación que daquela estaba aínda no Goberno español.