O alcalde de Kiev, Vitali Klitschko, criticou os "erros" do presidente ucraíno, Volodimir Zelenski, e emprazouno a ser "honesto" coa situación da guerra.
"A xente pregúntase por que non estabamos mellor preparados para esta guerra, por que Zelenski negou até ao final que chegariamos a isto", afirmou Klitschko nunha entrevista co xornal suízo 20 Minuten que tivo ampla repercusión en Ucraína e Rusia.
"Había moita información que non se correspondía coa realidade", argumentou. Ademais, pediulle "honestidade" sobre a auténtica situación tras o inicio do conflicto e sinalou que "Zelenski está a pagar polos erros que cometeu".
"Sempre podes mentir euforicamente ao noso pobo e aos nosos aliados, pero non podes facelo para sempre", argumentou antes de expresar o seu respaldo ao xefe do Estado Maior das Forzas Armadas, o xeneral Valeri Zaluzhni, quen foi duramente criticado por dicir que a guerra estaba nun "punto morto".
"Dixo a verdade. Ás veces a xente non quere escoitar a verdade, pero ao final el é o responsábel. Explicou e xustificou cal é a situación actual", resaltou Klitschko.
Zelenski
Xa pola tarde, Zelenski sinalou no seu habitual discurso vespertino que "todo o mundo debe lembrar que a batalla polo destino de Ucraína continúa".
"Todo o mundo debería lembrar que a batalla polo destino de Ucraína continúa. Non é en redes sociais, non con discusións sobre cuestións políticas, non con rifas. Esta batalla é a que os ucraínos deben apoiar cada día", argumentou.
