O ministro de Asuntos Exteriores, Unión Europea e Cooperación, José Manuel Albares, adiantou esta sexta feira que Moncloa protestará ante o Executivo israelí pola decisión de impedir que o Consulado Xeral en Xerusalén atenda a cidadanía palestina residente en Cisxordania, á vez que negou que no Goberno español haxa "antisemitas".
Nunha entrevista en RAC1, o ministro precisou que o Goberno vai analizar o anuncio realizado polo seu homólogo israelí, Israel Katz, e "desde logo se iso é unha decisión tal e como se le da literalidade, entón protestaremos", dixo. Albares non quixo adiantar acontecementos sobre que forma terá esa protesta do Goberno, á espera de coñecer en detalle en que se traduce a medida anunciada por Katz.
"En resposta ao recoñecemento do Estado palestino por parte de España e as declaracións antisemitas da vicepresidenta do Goberno non só de recoñecer un Estado palestino senón de 'liberar Palestina desde o río até o mar', decidín cortar a conexión entre a representación de España en Israel e os palestinos e prohibir ao Consulado español en Xerusalén dar servizo aos palestinos de Cisxordania", apuntou o ministro de Exteriores israelí. Tamén subliñou, en referencia á vicepresidenta Yolanda Díaz, que "se esta persoa ignorante e chea de odio quere entender o que busca realmente o islam radical, debería estudar os 700 anos de dominio islámico en Al Ándalus, hoxe España".
Así as cousas, Albares aproveitou para reivindicar a "decisión realmente histórica" de recoñecer o Estado palestino e defendeu que até a vindeira terza feira, cando o Consello de Ministros aprobará formalmente o recoñecemento, "todos temos que unir forzas para que do que se fale sexa do recoñecemento do Estado palestino, da situación dos palestinos en Gaza e da solidariedade cos palestinos".
"Non temos que permitir que ninguén, pola súa, sobreactuación enturbe esa conversa, que é a que se debe ter", reivindicou, en aparente referencia á reacción do Goberno de Benjamin Netanyahu, que xa chamara a consultas a súa embaixadora en España, Rodica Radian-Gordon, e convocara a embaixadora española en Tel Aviv, Ana María Salomon. "Non deixemos que aqueles que queren imposibilitar definitivamente a solución de dous Estados triunfen", agregou.
En canto á crítica dirixida á vicepresidenta segunda e ministra de Traballo, Yolanda Díaz, por parte do ministro israelí por defender unha Palestina "desde o río até o mar", Albares recalcou que "no Goberno de España non hai antisemitas", senón que é "un Goberno tolerante, plural e diverso, que non acepta ningún discurso de odio, incluído o antisemitismo".
"Os españois xudeus son unha parte fundamental da poboación española, e por suposto as actitudes antisemitas non só non teñen cabida, senón que desde o Goberno de España combatémolas", acrecentou. Albares defendeu que a política exterior no Goberno márcana o presidente, Pedro Sánchez, e el como ministro de Exteriores, e ambos os dous deixaron claro "en múltiples ocasións" que cren na existencia do Estado de Israel.
Así as cousas, non quixo entrar a pronunciarse sobre se Díaz debería rectificar as súas palabras. "Non lle teño que dicir á vicepresidenta o que ten que facer ou deixar de facer", replicou, á vez que sinalou que "cada cidadán é libre de emitir as súas opinións". Con todo, "unha cousa son as opinións e outra cousa son as liñas políticas, e esas saen do Ministerio de Asuntos Exteriores", puntualizou.
