O xuízo que tivo lugar na Audiencia Nacional contra Iberdrola e catro dos seus directivos por presuntamente idear un sistema que en decembro de 2013 provocou unha suba do prezo da luz que supuxo un prexuízo para os consumidores quedou visto para sentenza tras 21 sesións e cos procesados renunciando á última palabra.
Se a pasada cuarta feira as defensas dos acusados atacaban a falta de probas para sustentar esa acusación, esta quinta feira a defensa do directivo da enerxética José Luis Rapún puxo o foco no suposto beneficio que obtería a enerxética con esta manobra para destacar que nunca existiu.
Por iso, aseverou que non pode haber mala fe por parte da compañía porque "ninguén urde maquinacións" para provocar un fenómeno que supón unha subida de prezos que lle prexudica economicamente. Neste sentido, atacou os informes da Comisión Nacional do Mercado e da Competencia (CNMC) sinalando que o seu cálculo do beneficio que obtería a compañía era "incompleto" e "simplista" dado que non tiña en conta o que tiveron que comprar nese final de 2013.
Tras isto, volveu a incidir nunha tese que desde as defensas puxeron sobre a mesa día tras día e é que a alza dos prezos nese 2013 debeuse á "tormenta perfecta" vivida, a un feito "insólito e extraordinario", e é que coincidiu un período de seca cunha elevación de prezos do gas, unha onda de frío que aumentou a demanda, varias indispoñibilidades de plantas e unha importante falta de vento.
Á espera de sentenza
Tras a celebración da vista, as partes quedan agora pendentes da sentenza do maxistrado do Xulgado Central do Penal Único, José Manuel Clemente Fernández-Prieto, que, segundo fontes xurídicas consultadas, é posíbel que alongue o redactado da mesma máis alá do Nadal.
Cabe lembrar que o fiscal do caso solicita a pena de dous anos de prisión para os catro directivos procesados con accesoria de inhabilitación especial para emprego ou cargo público, profesión, oficio, industria, comercio, relacionado coa xeración ou comercialización de enerxía eléctrica.
O Ministerio Público pide igualmente que se impoña a Iberdrola unha pena de multa de 5,4 millóns de euros. Cifra moi inferior á que pedía ao comezo de 84.891.272 euros.
En novembro de 2015 a Comisión Nacional do Mercado e da Competencia impuxo unha sanción de 25 millóns de euros a Iberdrola Xeración pola manipulación do prezo da enerxía eléctrica, considerada como unha conduta moi grave, en referencia ás actuacións realizadas mediante o incremento do prezo das ofertas das centrais hidráulicas de Douro, Sil e Texo, entre o 30 de novembro de 2013 e o 23 de decembro de 2013.
