Seis empresas estranxeiras aspiran a ficar con toda a eólica mariña galega

Os obxectivos que se marca o Goberno do Estado co Plan de ordenación dos espazos marítimos (POEM), aprobado esta terza feira en Consello de Ministros, é xerar entre 1.000 e 3.000 megawatts de electricidade procedente da eólica mariña en 2025. A este respecto, a ministra de Transición Ecolóxica, Teresa Ribera, apuntou que "o Plan nacional integrado de enerxía e clima (Pniec) 2021-2030 prevé unha capacidade de 50.000 megawatts de potencia eólica instalada en 2030, tendo en conta a eólica mariña e a eólica terrestre", o que significa, na práctica, duplicar a potencia actual do Estado de 25.700 megawatts. Ribera aposta por converter o Estado nun “referente internacional e europeo en capacidades industriais e o conxunto da cadea de valor destas enerxías, contribuíndo ao liderado industrial europeo neste ámbito, desenvolvendo as capacidades para o aproveitamento das oportunidades laborais, e xerando cadea de valor en todo o ciclo de vida cunha perspectiva de economía circular”. Vigo e o Baixo Miño O POEM fixa cinco zonas na costa galega para o desenvolvemento da eólica mariña. A primeira delas, denominada como NOR-1, emprázase a 22,3 quilómetros de Vigo e do Baixo Miño, sendo esta unha das áreas onde o Estado español procedeu a recortar a proposta inicial. Segundo se recolle na cartografía do Plan de ordenación dos espazos marítimos, a súa extensión ocupa arredor de 117 km2. Rego sobre o POEM: “Os buques pesqueiros non cotizan en bolsa, as grandes enerxéticas, si” A Mariña e Ortegal As costas da Mariña e Ortegal acollen os polígonos NOR-2, NOR-3 e NOR-4, unhas das zonas polas que apostan máis promotores. O NOR-2 emprazase a 22,3 km de Ortegal e a súa extensión aproxímase na nova delimitación a 1.500 km2, unha superficie que multiplica por tres A Fonsagrada, o concello máis extenso da Galiza. O polígono NOR-3 ve recortada a súa extensión até 120 km2 , mantendo as mesmas dimensións iniciais de 75,2 km2 o NOR-4 .A denominada zona NOR-5 emprázase na súa totalidade na costa da Mariña, cunha superficie próxima a 350 km2. Galiza concentra case a metade dos MW de eólica mariña que tramita o Goberno español A potencia eólica mariña solicitada na Galiza con anterioridade á aprobación definitiva do POEM sitúase en 5.805 megawatts. A maior densidade de proxectos concéntranse na costa cantábrica, con peticións de autorizacións para seis parques que suman unha contía total de 3.485 megawatts. Nesta área, a totalidade das instalacións proxectadas coinciden con caladoiros tradicionais da frota galega, afectando tan só un deles, o parque Galwind, a 30 bancos de pesca. A capacidade de xeración dos parques en tramitación na Galiza supera a prevista para todo o Estado até 2030. Neste sentido, a Folla de ruta da eólica mariña impulsada polo Ministerio para a Transición Ecolóxica (Miteco) apunta a unha potencia total para o conxunto estatal cifrada entre 1.000 e 3.000 megawatts, no mellor dos casos 2.805 megawatts menos da potencia solicitada polos operadores enerxéticos que aspiran a instalarse na costa galega. Seis empresas foráneas Seis empresas, ningunha delas galega, pelexan pola eólica mariña do país. Iberdrola promove dous parques na área da Mariña e Ortegal cunha potencia total de 980 megawatts (MW). Ferrovial, a multinacional da familia Del Pino, solicita unha concesión na Mariña e outra fronte a Vigo cunha capacidade de xeración de 1.005 MW. Ecoloxistas en Acción informa negativamente ao Ministerio sobre o parque eólico mariño Ventus Capital Energy, a empresa do ex xenro de Florentino Pérez, Jesús Martín Buezas, impulsa dúas instalacións localizadas na Mariña e nas Rías Baixas cunha potencia de 1.020 MW. Cobra, participada pola multinacional francesa Vinci e o grupo de Florentino Pérez ACS, promove un parque de 1.000 MW fronte a Ortegal. As madrileñas Bluefloat e Sener impulsan unha instalación de 1.200 MW entre a costa Ártabra e a de Ortegal. Abei Energy, con sede social en Córdoba, proxecta un complexo eólico de 600 MW na Mariña. O impacto na pesca Os emprazamentos escollidos por estas compañías na costa galega, conforme á delimitación fixada polo Estado, teñen provocado a protesta xeneralizada do sector pesqueiro galego. Neste sentido, a Plataforma en Defensa da Pesca e dos Ecosistemas Mariños ten denunciado o importante impacto destes proxectos nos caladoiros galegos, até cifrar en máis de 100 as zonas de pesca afectadas. O voceiro do colectivo, que agrupa todas as confrarías galegas, Torcuato Teixeira, cualifica o POEM en declaracións a Nós Diario como “o maiar ataque da historia contra a pesca e os ecosistemas mariños”. Sinala que “está á altura dos atropelos cometidos pola Comisión de Pesca da Unión Europea, reservándose de partida zonas específicas para o oligopolio eléctrico”. As grandes eléctricas puxan polo mar galego: así son os nove parques eólicos proxectados no país Teixera entende que “os lobbies enerxéticos dobraron o brazo ao Ministerio de Transición Ecolóxica e convenceron a ministra Teresa Ribera, de que estas industrias só buscan o interese xeral e que son totalmente inocuas e non van afectar nin os ecosistemas mariños nin o sector pesqueiro”. Torcuato Teixeira explica que “os lobbies enerxéticos elaboraron un discurso en base aos ditados que tan ben saben facer do chamado greenwashing ou lavado verde, e Teresa Ribeira comproullo entusiasmada a cambio de sacrificar todo o sector pesqueiro". 47% de toda a eólica mariña do Estado estará emprazada na Galiza Arriba á esquerda, a demarcación noratlántica para situar a eólica mariña, e á dereita a demarcación levantino-balear. Abaixo, a demarcación do Estreito e Alborán e á dereita, a demarcación canaria. (Infografía: Nós Diario) O Plan de ordenación dos espazos marítimos aprobado polo Goberno do Estado reserva para a eólica mariña perto de 5.000 km2, dos cales 2.350 están emprazados nas augas galegas. Neste sentido, o documento aprobado polo Executivo ten unha vixencia de catro anos, na medida que desde o Executivo entenden que en 2027 as áreas destinadas para a eólica mariña estarán ocupabas e en proceso de desenvolvemento polas empresas enerxéticas. A proposta de ordenación foi obxecto de valoración desde diversos ámbitos ao longo da xornada desta terza feira. Así, o presidente da Xunta da Galiza, Alfonso Rueda, manifestou que o Goberno galego non autorizará "ningún parque eólico mariño que poña en risco os recursos pesqueiros", pero cualificou a eólica mariña de “enorme oportunidade” para a Galiza. O deputado do BNG no Congreso, Néstor Rego, afirmou que “o Goberno do Estado ponse, máis unha vez, do lado das grandes empresas enerxéticas e non do sector pesqueiro galego” e asegurou que “a aprobación do POEM corrobora que o Goberno do Estado está sendo cómplice do boom eólico depredador na Galiza”. Desde o campo sindical, a CIG cualificou a norma como “un novo ataque ao sector pesqueiro e ás capacidades produtivas da Galiza”. O seu secretario xeral, Paulo Carril, criticou que “as grandes corporacións empresariais son as que planifican e deciden, valéndose de inxentes recursos públicos, limitándose os Gobernos a executar unha transición enerxética, cada vez máis inxusta social e territorialmente”.