"Non se pode demostrar" que os aeroxeradores situados no mar afecten a actividade pesqueira. Con esta rotundidade compareceu ante a prensa esta sexta a ministra Teresa Ribera após presidir en Ferrol a inauguración de VI edición do Congreso internacional 'GOinterHUB', organizado por GOE-Asime, Windar Renovables, Navantia Seanergies e a Xunta da Galiza. "Após un rastrexo moi intenso, e após traballar con outros estados nos que houbo un desenvolvemento de eólica offshore, constatouse que non se pode demostrar un efecto negativo", defendeu a titular de Transición Ecolóxica do Goberno español.
"Ao contrario, xa que moitas veces polo tipo de ancoraxe e a distancia dos aeroxeradores o que se produce é unha rexeneración", reivindicou Ribera, que asegurou tamén que os Plans de ordenación do espazo marítimo (POME) "buscan o máximo consenso, e por iso aprobáronse con case dous anos de atraso, integrando todas as preocupacións, todos os datos que se achegaron de pesca, todas as recomendacións, alegacións e observacións da Xunta" e de entes como Patrimonio Histórico, "ademais de incorporar as achegas das confrarías".
Con todo, matizou, "iso non significa que nos poidamos descoidar, e temos moi claro que non é o mesmo o mar do Norte que a costa galega", polo que "hai que estar moi vixiantes para estes primeiros proxectos", subliñou. A ministra apuntou tamén que "sería unha falta de responsabilidade por parte das institucións que non se poida desenvolver este sector, que está prohibido, xa que sería moi difícil a súa xustificación".
Na mesma liña, valorou as "garantías" que ofrecen os POEM: "Hoxe aqueles que ven con gran precaución que pode representar para a súa actividade tradicional o crecemento da enerxía eólica offshore, contan cun sistema moito máis garantista", dixo. "Xa están identificados —incidiu— aqueles sitios onde existe un potencial importante e onde, no resto, non será posíbel".
Unha eólica "respectuosa" con Ferrolterra como "líder"
O alcalde de Ferrol, Ángel Mato, tamén presente nesta inauguración, foi insistente en que na eólica mariña ten que ser "respectuosa co medio ambiente, coa pesca e mesmo coa defensa nacional". Agora, proseguiu, "abre un novo proceso para poder manter a industria, coas posibilidades da instalación de parques mariños". Mato reclamou "o polo de investigación de enerxías renovábeis" nesta cidade.
Na súa quenda, a secretaria xeral de Industria, Paula Uría, detallou que "no contexto actual é necesario abrir espazos como este para abordar o debate da eólico mariña" e que ademais "na Galiza quérese facelo ben, con diálogo, de maneira sostíbel, buscando o máximo acordo e que a transición sexa xusta, desde o ámbito ambiental e tamén no ámbito pesqueiro, con negociación", onde é necesario "compatibilizar o sector pesqueiro coa xeración da industria".
O alcalde de Fene (Ferrolterra), o nacionalista Juventino Trigo, manifestou que "este encontro sitúa Ferroltera como líder do sector eólico mariño", un sistema enerxético que "logra un sistema respectuoso co medio ambiente".
E Ricardo Domínguez, presidente de Navantia, puxo o foco en que a empresa naval pública "é líder mundial, conxuntamente cos seus colaboradores, na construción de soportes para a eólica mariña, estando agora mesmo en até noventa licitacións", e que desde este empresa queren "exercer como compañía tractora".
Finalmente, o director xeral de Windar Renovables, Orlando Alonso, adiantou que "proximamente se inaugurará a nova planta de fabricación de monopiles XXL" no estaleiro de Fene, nun proxecto conxunto con Navantia.