Os prezos dos alimentos marcan na Galiza o seu segundo aumento récord consecutivo

O Índice de Prezos de Consumo (IPC) subiu na Galiza 0,4% en marzo en relación co mes anterior e recortou tres puntos porcentuais a súa taxa interanual, até 3,4%, segundo datos publicados esta sexta feira polo Instituto Nacional de Estatística (INE). Así, o IPC queda no país unha décima por encima da taxa interanual rexistrada a nivel estatal, onde os prezos se incrementaron 3,3% en marzo respecto ao mesmo mes de 2022. A inflación aumenta en marzo case medio punto con respecto a febreiro En concreto, o prezo dos alimentos e as bebidas non alcohólicas foi o apartado que máis encareceu nos últimos 12 meses, disparándose na Galiza ao récord histórico (a serie histórica conta con datos desde 2002 para a Galiza) de 16,6% por segundo mes consecutivo, mentres que as bebidas alcólicas e o tabaco encareceron 8,5%. Pola súa parte, os restaurantes e hoteis aumentaron o seu custo en 7,5%, mentres que os mobles e os artigos do fogar fixérono en 7%. O ocio e a cultura encareceron 4,3%, e tamén subiron de prezo as comunicacións (2,4%), o vestido e o calzado (2%), así como as medicinas (1,8%). Ademais, o resto de produtos e servizos non incluídos noutros apartados aumentaron o seu custo en 5,8%. Pola contra, a maior caída de prezo experimentouse en vivenda, agua, electricidade, gas e outros combustíbeis (17,9%). Por outra parte, tamén se abaratou o transporte (4,1%) e a ensinanza (0,8%). O prezo dos alimentos subirá 12% en 2023 Con respecto aos prezos do mes de febreiro, destacan as subas das bebidas alcólicas e o tabaco (1,5%), do vestido e o calzado (1,2%), dos alimentos e bebidas non alcólicas (1,1%) e dos restaurante e hoteis (1%). No apartado das baixadas de prezo mensuais, só é significativa a de vivenda, agua, electricidade, gas e outros combustíbeis (2,3%). Segundo o INE, mentes que os prezos dos alimentos creceron en marzo na Galiza 16,6% en taxa interanual, marcando por segunda vez consecutiva a súa taxa récord desde o ano 2002, a taxa interanual no conxunto do Estado español descendeu unha décima porcentual até 16,5%. O prezo do azucre incrementouse máis de 50% nos últimos 12 meses Estatística non ofrece datos desagregados da evolución do prezo dos diferentes alimentos na Galiza. Porén, a nivel do Estado español destacan as subas do azucre (50,4%), da manteiga (37,7%), do leite (30,8%), dos legumes e hortalizas (27,8%), das fariñas e cereais (24,9%), dos ovos (24,5%), do arroz (22,2%) e das patacas (20,8%). En termos mensuais, son rechamantes os incrementos de prezo dos legumes e hortalizas (5,7%), da carne de porco (4,5%), dos zumes de froita (3%), das patacas (2,9%), do té (2,2%), da confeitaría (2%), do cacao (1,9%), do chocolate (1,8%) e dos ovos (1,5%). Até 40% dos alimentos con rebaixa do IVE encareceron Catro de cada dez dos alimentos afectados pola rebaixa do Imposto sobre o Valor Engadido (IVE) subiron o seu prezo nos lineais dos supermercados desde a entrada en vigor da medida aprobada polo Goberno estatal, polo que continúa a escalada inflacionista tendo en conta que en marzo eran tres de cada dez os que se encareceron, e en febreiro dous de cada dez, segundo denuncia Facua-Consumidores en Acción, que realizou en abril un seguimento sobre a evolución de case 1.000 prezos de alimentos en oito cadeas de distribución. O FMI pide progresividade fiscal para conter a inflación En concreto, a asociación revisou durante o mes de abril a evolución dun total de 991 prezos en oito cadeas de distribución, onde detectou que en 416 casos, é dicir, en 42% dos produtos examinados, o custo aumentou con respecto ao que tiñan o pasado 30 de decembro unha vez aplicada a rebaixa do IVE. O maior número de anomalías detectouse na cadea Aldi, onde encareceron 29 de 57 prezos analizados (50,8%), seguido por Carrefour, con 82 produtos máis caros que o 30 de decembro sobre unha mostra de 167 (49,1%). Pola súa parte, Alcampo aumentou 62 dos 133 prezos analizados (46,6%), mentres que Hipercor fíxoo en 77 dos 166 alimentos estudados (46,3%). No caso de Lidl detectáronse 25 prezos máis caros sobre un total de 56 (44,6%), mentres que en Dia encarecéronse 56 artigos dos 139 que foron revisados (40,2%). As dúas cadeas onde se rexistrou unha menor porcentaxe de suba de prezos (entre as que foron estudadas por Facua) son Eroski, con 42 produtos do total de 129 analizados (32,5%), e Mercadona, con 43 subas entre os 144 prezos rexistrados (29,8%). Facua sinalou que este total de 416 prezos máis caros en abril contrasta cos 312 detectados en marzo e os 178 de febreiro sobre unha mostra moi similar (991 este mes polos 1.012 de marzo e os 1.020 de febreiro), polo que denuncia que só nun mes foron máis dun centenar de produtos adicionais afectados pola rebaixa do IVE os que encareceron. A diferenza de prezo entre os alimentos en orixe e nas tendas alcanzou 563% en marzo Non obstante, as explotacións do sector primario non se beneficiaron destes incrementos nas cadeas de supermercados, tal e como demostra o Índice de Prezos en Orixe e Destino dos alimentos (IPOD), calculado tendo en conta os prezos en orixe dos produtos agrícolas e gandeiros e os prezos de venda ao consumidor final no mercado. Así, o IPOD indica que no mes de marzo a diferencia porcentual entre o primeiro e o último elo da cadea foi de media de 563%. Froita e verdura, o que máis encareceu nos supermercados Do total de 416 prezos nos que Facua detectou unha suba na súa comparativa de prezos, 152 corresponden a froitas ou verduras (36,5% do total), 80 son aceites de oliva (19,2%) e 63 son leites ou lácteos (15,1%). Pola súa parte, localizáronse 54 incrementos de prezos entre os arroces e as pastas (12,9%) e 33 entre os legumes (7,9%). Os outros 30 prezos corresponden a ovos, fariñas e pans. Desta forma, as maiores subas de prezos neste último mes correspóndense, como vén sendo habitual, a froitas ou verduras. En concreto, as cebolas, as cenorias e a leituga iceberg encarecéronse de forma moi notábel en practicamente todos os supermercados. Denuncia ante a CNMC Desta forma, e tras esta análise, Facua anunciou que amplía as denuncias que xa presentou en xaneiro, febreiro e marzo ante a Comisión Nacional dos Mercados e a Competencia (CNMC), que até a data segue sen darlle ningún tipo de resposta. Así, as denuncias volverán dirixirse contra Alcampo, Aldi, Carrefour, Dia, Eroski, Lidl, Hipercor e Mercadona. Ademais, a organización reclamou que o Goberno do Estado español fixe prezos máximos en alimentos básicos, para o que está facultado pola lei de comercio do ano 1996.