Os ingresos de máis de 201.000 persoas na Galiza están por baixo do salario mínimo

O salario mínimo interprofesional (SMI) sitúase na Galiza neste ano en 15.120 euros anuais. Porén, 85.558 traballadoras e traballadores pertencentes ao Réxime Xeral da Seguridade Social recibiron unhas retribucións por baixo desa contía. A situación é aínda máis preocupante no caso das empregadas e dos empregadas que cotizan polo Réxime Espacial de Traballadores Autónomos (RETA), até o punto de que 115.944 recibiron uns salarios por baixo do SMI. O salario medio na Galiza é 25,3% inferior ao do conxunto da Unión Europea Os últimos datos de ingresos salariais fornecidos neste ano pola Axencia Estatal da Administración Tributaria (AEAT) refírense a 2021. Os atrasos na súa publicación en relación coas anualidades contábeis débense a que a información procede das declaracións da renda.Porén, esa é a súa fortaleza, pois as cifras correspondese con datos reais e non con estimacións estatísticas, o que leva a empregalos en case todos os estudos sobre as rendas. Asalariados 88.558 asalariadas e asalariados declararan uns ingresos por baixo do SMI. Segundo os datos da AEAT para 2021, 33.413 homes e 52.145 mulleres rexistran un salario por baixo de 15.120 euros ao ano. Ademais, 30.425 traballadoras e traballadores afiliados ao Réxime Xeral da Seguridade Social perciben unhas retribucións inferiores a 14.000 euros ao ano. Nesta situación, atópanse 11.586 varóns e 18.839 mulleres, sendo a parcialidade un dos factores que agudiza a fenda de xénero. Os ingresos de 46.681 asalariadas e asalariados atópanse entre 14.000 e 15.000 euros anuais. Asemade, desde 2009 asístese a un crecente incremento da desigualdade como consecuencia de acudir á desvalorización interna para a xestión da Gran Recesión. Neste sentido, as rendas da poboación situada na parte máis alta da táboa (máis de 10 veces o SMI) medraron o dobre que o dos restantes grupos, até o punto que o salario medio anual dunha persoa situada neste intervalo de ingresos equivalía no ano 2009 a 67 da parte máis baixa da táboa, aumentando esta equivalencia até 93 en 2021. As mulleres con obesidade cobran até 9% menos en comparación con outras traballadoras O secretario de negociación colectiva da CIG, Francisco Sío, explica a Nos Diario que “os informes laborais anuais que elabora a nosa central sindical destacan que a suba do salario mínimo benefician un número importante de traballadores e traballadoras e o conxunto da actividade económica, porque ao distribuír as rendas, aumenta o poder adquisitivo da clase traballadora e iso dinamiza a economía”. A este respecto, significa que “contra o criterio do Banco de España e dos economistas neoliberais, o SMI non destrúe emprego, pola contra increméntao, como se pode observar hoxe”. Sío considera insuficiente a contía do salario mínimo e defende o seu incremento en 2024 a 17.016,1 euros anuais. A este respecto, apunta que “o Estado español incumpre o disposto polo Comité Europeo de Dereitos Sociais (CEDS), que determina que o SMI debe corresponderse con 60% do salario medio. Porén, na actualidade só representa 50%”. Nesta dirección, lembra que “a CIG vén de presentar unha reclamación colectiva diante do CEDS”, unha demanda apoiada, tamén, por UXT. Traballadores por conta propia A situación é aínda mais grave no caso de traballadores e traballadoras por conta propia. Un total de 86.645 autónomas e autónomos galegos rexistran uns ingresos entre cero e 12.600 euros. Neste caso, 22.393 profesionais por conta propia (10,7% do total do colectivo) declaran unhas rendas netas anuais de entre cero e 3.150 euros, isto é 262,5 euros ao mes, en 14 pagas, unha contía inferior á cota mínima fiscal da RETA, fixada para 2019 en 283,3 euros. Asemade, outros 8.790 autónomos (4,2% do colectivo) contan cuns ingresos netos anuais situados entre 3.150 euros e 4.200 euros; e 20.928 (10% dos afiliados á RETA na Galiza) ten unhas rendas de entre 4.200 e 6.300 euros. A Axencia Estatal da Administración Tributaria sinalaba que en 2021, até 13.374 traballadoras e traballadores por conta propia declaraban unhas rendas netas anuais pola súa actividade entre 6.380 e 8.400 euros. A maiores, 22.184 autónomos (10,6% do total do colectivo) rexistran uns ingresos anuais situados entre 8.400 e 15.1200 euros. Na mesma dirección, outras 9.043 persoas adscritas ao Réxime Especial de Traballadores Autónomos presentaban unhas retribucións de entre 12.600 e 14.000 euros netos ao ano. Concretamente, os ingresos anuais de 115.944 traballadoras e traballadores por conta propia están por baixo do SMI. Os salarios brutos anuais na Galiza son 2.700 euros inferiores á media estatal O presidente da Unión Profesional de Traballadores Autónomos (UPTA), Eduardo Abad Sabarís, sinala a Nós Diario que “as rendas dos autónomos na Galiza están en relación coa realidade do traballo por conta propia na Galiza. Este distribúese fundamentalmente no sector servizos, moi concretamente no comercio retallista e na hostalaría, dous sectores que están sufrindo moito a crise. As baixas rendas dos empregados por conta propia na Galiza débense a que temos, por dicilo dun modo coloquial, os ovos postos en dúas cestas, que son as cestas de dous sectores que están nunha situación de máxima precariedade”. A desigualdade salarial incrementouse desde 2009 A relación entre as rendas do capital e do traballo é un dos principais indicadores para medir as desigualdades sociais. A este respecto, Tomas Pikkety no seu volume O capital século XXI escribe que “o aumento sostido na participación das rendas do capital no PIB permite explicar o aumento da desigualdade". O retroceso das rendas do traballo fronte ás do capital é unha constante na Galiza. O Instituto Galego de Estatística (IGE) sinala que en 2022 as rendas do traballo representaron 45,5% do Produto Interior Bruto (PIB), mentres que en 2009 sumaban 48% do PIB. Neste sentido, os datos ofrecidos pola Xunta da Galiza certifican a perda de poder adquisitivo dos asalariados galegos, que rexistran unha das peores distribucións das rendas do espazo estatal e europeo. A Galiza rexistra nesta variábel unhas cifras peores que o Estado español e que a Unión Europea. Sen ir máis lonxe, en 2021 as rendas do traballo significan na media estatal 47,5% do PIB, exactamente dous puntos por riba da porcentaxe galega, malia partillar unha mesma lexislación laboral e contar cunha poboación máis envellecida, onde o impacto da desvalorización interna é inferior. As diverxencias son maiores cos Estados da UE, onde as achegas do factor traballo á conformación do PIB sitúase en 47,8%.