A economía social xera na Galiza máis de 17.000 empregos directos entre os vinculados a centros especiais de emprego, cooperativas, sociedades laborais, mutualidades ou as confrarías de pescadores, estas cun peso de máis de 40% do total.
Así o recolle un informe elaborado por persoal docente e investigador da Facultade de Ciencias Económicas da Universidade de Santiago de Compostela (USC) que foi presentado esta segunda feira na capital galega.
O estudo, que deu a coñecer ante decenas de alumnos e de alumnas a profesora Maite Cancelo, directora do organismo encargado da súa elaboración, apunta que en 2022 creáronse na Galiza 142 cooperativas, o que constitúe a cifra máis elevada da serie histórica.
Por outra parte, a Galiza conta cun total de 1.265 cooperativas e 735 sociedades laborais activas, 124 centros especiais de emprego, 13 empresas de inserción laboral, catro mutuas e mutualidades, 63 confrarías de pescadores, 1.052 sociedades agrarias de transformación e 3.029 comunidades de montes veciñais en man común.
A nivel de emprego, con estimacións extraídas de datos do Ministerio de Traballo e Economía Social do segundo trimestre de 2020, na Galiza hai un total de 7.917 empregos vinculados a cooperativas, 2.162 a sociedades laborais, 2.185 a centros especiais de emprego, 211 a empresas de inserción laboral e 13 a mutuas e mutualidades.
O estudo apunta a "dificultades" para calcular os datos de emprego para o resto da economía social, aínda que salienta o especial peso das afiliacións á Seguridade Social nas confrarías, cun total de 6.997. Ademais, a estas habería que engadir os traballadores e as traballadoras das 4.063 empresas vinculadas ás confrarías de pescadores que non computan no informe realizado pola USC.
