Unha empresa de Lugo denuncia Coca-Cola por "prácticas ilegais" na distribución

O empresario lucense José Luís Rodríguez Fernández, xerente de Dislugo S.L., denunciou ante a Fiscalía Xeral do Estado español a Coca-Cola European Partners por "prácticas ilegais" na distribución de produtos, mentres esta nega infrinxir a normativa.
Sede de Coca-Cola European Partners en Madrid (Foto: Eduardo Parra / Europa Press).
photo_camera Sede de Coca-Cola European Partners en Madrid. (Foto: Eduardo Parra / Europa Press)

O xerente da compañía lucense de distribución Dislugo S.L., José Luís Rodríguez Fernández, presentou en xaneiro ante a Fiscalía Xeral do Estado español unha denuncia contra a empresa Coca-Cola European Partners, á que tivo acceso Nós Diario

Segundo explica Rodríguez Fernández, "Coca-Cola a partir do ano 2014 decidiu facer directamente a facturación das vendas de todos os seus produtos a nivel estatal, o problema reside en que os distribuidores teñen tarxeta de servizo propio, e non poderían levar as mercadorías dun terceiro, para o que se debe ter a tarxeta de servizo público".

Unha afirmación que é ampliada polo seu avogado, Javier Roldán, que sinala que "cunha tarxeta de transporte propio tan só se pode levar produto que che pertence, non se pode levar produto dun terceiro porque non se está habilitado para iso".

Nunha peza de son á que tivo acceso este xornal, pódese escoitar unha conversa entre o xerente de Dislugo S.L. e dous persoas que supostamente son Executivos da compañía Coca-Cola European Partners. 

Na conversa, Rodríguez Fernández advirte os seus interlocutores de que "o primeiro que piden 'os de tráfico' son as facturas da carga -que levan os distribuidores para comprobar que os produtos son da súa propiedade-". O primeiro dos interlocutores reafirma esta cuestión: "Si, múltanche no momento", afirma. Pola súa parte, o segundo interlocutor replica ao respecto: "Mais quítancha". 

A continuación, o primeiro interlocutor explica o proceso: "Mais despois ti vas a 'tráfico', presentas a factura que nós che facemos e despois a multa convértese en 50 euros, métenche unha multa de 6.000 euros, iso pasoulle a un distribuidor noso de Vigo, que lle meteron unha multa de 6.000 euros a el e 6.000 euros a nós". "A vós tamén?", pregunta o xerente de Dislugo. "Si, a nós tamén, vai a multa para os dous, o distribuidor chamounos, nós presentamos a factura, repito nós presentamos a factura conforme o distribuidor era dono do produto, presentamos iso e quitáronlle a multa e pagou 50 euros", contesta o primeiro interlocutor.

Coca-Cola European Partners nega actos ilegais

Consultada por Nós Diario, Coca-Cola European Partners nega incorrer en ningún tipo de acto ilegal na distribución de produtos. "Este señor ten unha débeda aínda con nós pendente de pagar e descoñezo a denuncia que poida ter interposto, será en calquera caso a Fiscalía a que emita a correspondente decisión", sinala un responsábel comercial da compañía.

"Consideramos que cumprimos con toda a lexislación vixente", aclara o responsábel comercial. "Ningunha das cousas que ten denunciado [José Luís Rodríguez Fernández] tivo ningunha consecuencia", prosegue. "O que di non ten ningunha base xurídica", conclúe.

Denuncia na CNMC

Dislugo S.L. tamén denunciou unha suposta fixación de prezos de Coca-Cola European Partners no Estado español, que obrigaría os distribuidores a vender a un mesmo valor os produtos ante a a Comisión Nacional do Mercado e a Competencia (CNMC). 

Nunha contestación ao demandante á que tivo acceso Nós Diario, a CNMC sinala que "da información que achega, algunha podería representar un indicio de práctica contraria á Lei de Defensa da Competencia". Porén, segundo sinala o xerente de Dislugo S.L., a institución non tomou ningún tipo de acción resultante da denuncia nos últimos catro anos -foi interposta no exercicio de 2019-.

Unha queixa sobre a CNMC que comparte José Manuel Muíños, dono de New Stock Zero Companies 21 S.L., unha compañía con sede no municipio galego de Ares dedicada á importación e á exportación. "Eu gañeille un xuízo a Coca-Cola European Partners porque tiña unha serie de compromisos de exportación con eles que despois non cumpriron, ademais cuns avais moi fortes, cousa que puiden demostrar no xulgado e que resultou nunha indemnización superior a 400.000 euros", sinala o empresario a este xornal. 

"A raíz diso, denunciei tamén ante a CNMC, pois tiña uns compromisos con supermercados estranxeiros, froito dun acordo con Vegano -anterior xestor dos produtos da marca de refrescos- que non continuou despois da absorción por Coca-Cola European Partners", explica Muíños.

"Na CNMC debe ter moita man -a empresa demandada- porque en catro anos nin me contestaron, eu entendo que nalgún momento terá chegar a unha sentenza, pois facemos unha reclamación por danos de case 4 millóns de euros aportando probas periciais de créditos, mais a institución lavase ás mans polo momento", afirma o empresario.

"Chegáronme a dicir que non querían continuar o acordo por ser da Galiza, que eles preferían operar desde Barcelona", denuncia. "Parécenme moi ben as súas preferencias, mais o proceso de exportación inicieino eu, e non estaban no dereito de apartarme cando existían uns avais, por iso lles gañei o xuízo, entón non entendo a falta de resposta na CNMC", culmina Muíños.

Denuncia de fixación de prezos e zonas na distribución

Sobre a fixación de prezos, Rodríguez Fernández sinala que Coca-Cola European Partners “exixe vender a lata a un determinado prezo, e os distribuidores teñen que comerciar todos ao mesmo, o que nos impide ser competitivos". 

Nestas circunstancias, di, "calquera cadea de alimentación vende máis barato, pois o fabricante véndelles máis económico, tendo os distribuidores unha clara desvantaxe fronte aos competidores”, advirte.

Delimitación de zonas

"Ademais da fixación de prezos, a denuncia tamén recolle a queixa de que, durante anos, os embotelladores estabeleceron de forma inxustificada zonas de vendas exclusivas para os seus distribuidores, delimitando en que zonas e en que rúas poden operar, unha práctica que tamén limita a competencia e a competitividade", engade o empresario lucense.

A xerente dunha empresa galega do sector consultada por Nós Diario e que prefire non revelar a súa identidade sinala a fixación de prezos e a delimitación de zonas "como unha práctica común no mundo distribución".

"Tes que traballar nas condicións que che marcan, é como se non foras unha empresa independente, ou tomas esas condicións ou as deixas, e se non cumpres estás fóra", explica.

Comentarios