A economía da zona euro rexistrou unha contracción de 0,1% no terceiro trimestre de 2023 respecto aos tres meses anteriores, o que contrasta co avance de 0,2% do segundo tramo do ano, segundo confirmou esta terza feira Eurostat de maneira preliminar. Trátase da primeira caída do Produto Interior Bruto (PIB) trimestral desde o segundo trimestre de 2020, en plena crise pola pandemia da Covid.
En cambio, no conxunto da Unión Europea (UE), o PIB creceu 0,1% entre xullo e setembro, despois do estancamento do segundo trimestre. En comparación co mesmo trimestre de 2022, o PIB da zona euro ampliouse 0,5% e o da UE 0,4%.
Entre os Estados da UE cuxos datos están dispoñíbeis, o ritmo maior de avance trimestral correspondeu ao letón (0,6%), por diante do español (0,3%) e do francés (0,1%). Pola contra, o peor desempeño no trimestre foi o de Irlanda (-1,8%), Austria (-0,6%) e a República Checa (-0,3%). Alemaña, a principal economía comunitaria, cedeu 0,1% entre xullo e setembro, despois da suba de 0,1% durante o segundo trimestre.
Deste modo, as lecturas do PIB da zona euro e da UE volveron contrastar coa dos Estados Unidos de América, que no terceiro trimestre anotou unha alza de 1,2% en taxa intertrimestral.
Baixada da inflación
A taxa de inflación interanual da zona euro moderouse 1,4 puntos porcentuais en outubro en comparación co mes previo, alcanzando así 2,9%, o que supón o menor encarecemento dos prezos desde xullo de 2021, segundo datos anticipados de Eurostat, mentres que a taxa subxacente (sen alimentos frescos nin enerxía) reduciuse tres décimas porcentuais, a 4,2%.
Desta maneira, a suba de prezos no Estado español (3,5%) no mes de outubro, e previsibelmente na Galiza, foi maior que no conxunto da área monetaria. A evolución dos custos na zona euro ten unha influencia clave no país na medida en que o Banco Central Europeo (BCE) poida reducir os tipos de xuro se a inflación se achega a 2%.
