A Confederación Intersindical Galega (CIG), Comisións Obreiras (CCOO) e Unión Xeral de Traballadores (UXT) veñen de denunciar que Endesa non “está a cumprir coa garantía de emprego das persoas traballadoras da industria auxiliar nos traballos de pre-desmantelamento da central”.
As críticas dos sindicatos chegan tras anunciar o pasado 22 de novembro a eléctrica que a empresa adxudicataria dos traballos de desmantelamento da súa central das Pontes debería garantir a contratación dos traballadores das actuais auxiliares, co obxectivo de mantee o emprego.
Endesa comprometérase nunha reunión da Mesa para o Impulso da Actividade Económica das Pontes a garantir o emprego das perto das 80 persoas empregadas na industria auxiliar.
Moncobra
As centrais sindicais lembran que “os compromisos terían que ser cumpridos o pasado 1 de decembro” e revelan que “ a situación se veu retrasada pola entrada da contratista Moncobra, responsábel dos traballos de predesmantelamento”.
CIG, CCOO e UXT advirten que “malia a incerteza temos coñecemento que preto do 35% das persoas traballadoras afectadas seguen sen ser contratadas”. Neste punto, reclaman as administracións públicas alternativas como garante do acordo con Endesa.
Os sindicatos esixen “a convocatoria inmediata da Mesa para o Impulso da Actividade Económica das Pontes, para abordar esta situación e que se garanta a continuidade da totalidade das persoas traballadoras”.
A porta esta aberta para o retorno ás mobilizacións. Neste sentido, as centras sindicais manifestan que “de non ter contestación de maneira inmediata a esta petición, retomaranse as mobilizacións nas vindeiras datas”.
