A Campaña da Renda e Patrimonio de 2022 arrincou esta terza feira, 11 de abril, coa presentación das declaracións por internet, de acordo co calendario de contribuíntes da Axencia Tributaria. A campaña deste ano, que se corresponde cos ingresos obtidos durante o ano 2022, prolongarase entre o 1 e o 30 de xuño de maneira ordinaria, mais previamente, desde hoxe, poderanse presentar xa as primeiras declaracións do IRPF e de Patrimonio a través da rede, un medio que xa utilizan nove de cada dez contribuíntes.
Desde o próximo 5 de maio e até o 30 de xuño a declaración do IRPF poderá presentarse tamén por teléfono, e entre o 1 e o 30 de xuño, coincidindo co período ordinario da campaña, as persoas contribuíntes poderán presentala nas oficinas da Axencia Tributaria. Con resultado a ingresar e con domiciliación bancaria, o prazo conclúe o 27 de xuño. A Axencia Tributaria xa habilitou a descarga dos datos fiscais e parte dos contidos informativos da Campaña de Renda 2022, co obxectivo de adiantar as xestións nas declaracións.
Novidades destacadas deste ano
Plans de pensións e de empresa
Entre as novidades desta campaña destaca que a achega individual máxima aos plans de pensións privados con dereito a dedución no IRPF fica reducida a 1.500 euros anuais. Pola contra, as achegas máximas aos plans de empresa con dereito a dedución soben até os 8.500 euros para 2022. Entre ambas as dúas a achega total con beneficios fiscais mantense en 10.000 euros anuais.
Rendementos netos
No caso de actividades económicas en estimación obxectiva, auméntase a redución xeral sobre o rendemento neto de módulos do 5% anterior a 15% para o período impositivo 2022, medida aplicábel a todos os e as contribuíntes que determinen o rendemento neto da súa actividade económica conforme a este método.
Sector agrogandeiro
A maiores, para as actividades agrícolas e gandeiras, coa finalidade de compensar o incremento do custo de determinados insumos, o rendemento neto previo poderá minorarse en 35% do prezo de adquisición do gasóleo agrícola, e en 15% do prezo de adquisición dos fertilizantes, en ambos os casos, necesarios para o desenvolvemento das devanditas actividades. Tamén se van aplicar no período impositivo 2022 os índices correctores por pensos adquiridos a terceiros e por cultivos en terras de regadío que utilicen, para ese efecto, enerxía eléctrica.
Novo apartado para declarar as 'criptomoedas'
Nas modificacións máis destacábeis dentro das ganancias e perdas patrimoniais recóllese, así mesmo, a desagregación en tres subapartados do apartado denominado 'Ganancias e perdas patrimoniais derivadas de transmisións doutros elementos patrimoniais'. O primeiro, para declarar as derivadas da transmisión de inmóbeis e dereitos reais sobre bens inmóbeis; outro, para declarar as transmisións ou permutas de moedas virtuais —criptomoedas—, e un apartado de carácter residual para 'Outros elementos patrimoniais'.
Todo iso, explica Facenda, coa finalidade de facilitar o enchemento destes apartados, xa que en modelos anteriores debían cumprimentarse un código para identificar o tipo de elemento patrimonial que se transmitía. Aliás, a separación en subapartados específicos, permite individualizar as casas específicas de determinados elementos patrimoniais para o cálculo da ganancia patrimonial.
A casa da Igrexa, en mínimos na Galiza
As galegas e galegos son, dentro do Estado español, os que menos marcan a casa destinada á Igrexa católica nas súas declaracións da renda. Na última campaña, a de 2021, foron menos de unha de cada catro persoas (23,9% do total), un dato rechamante tendo en conta a media estatal, que se eleva a 31,29%. Son datos que ofreceu esta terza feira o bispo da Diócese de Mondoñedo-Ferrol, Fernando García Cadiñanos.
