Alcoa asegurou onte que só considerarán efectuar unha venda “baixo condicións específicas que permitan unha transferencia 'exitosa' do complexo e que inclúa garantías tanto para os traballadores como para nós", segundo explican fontes da compañía a Europa Press.
A multinacional asegura que recibiu en maio ofertas non vinculantes que poderían ser vinculantes a partir de xuño, segundo a estimación realizada pola compañía.
"Estamos comprometidos a seguir traballando xunto a todos as partes implicadas para atopar unha solución que asegure a viabilidade económica a longo prazo das operacións en San Cibrao", expoñen as mesmas fontes.
Porén, rexeitan dar detalles que, afirman, “se manterán confidenciais” e informarase delas "ao seu debido tempo aos implicados no proceso". Neste sentido, a pasada semana, o presidente de Alcoa, William Oplinger, advertiu de que "o éxito" de venda "depende da participación do Goberno e da flexibilidade sindical".
Sen estudo da balsa
Desde o comité de empresa, pola súa parte, seguen sen ter máis noticias sobre o proceso despois de que o pasado 16 de maio finalizase o prazo estabelecido para a presentación de ofertas.
Ademais, a CIG urxiu a pasada segunda feira a Alcoa para que realice o estudo sobre a balsa de residuos posto que “non está garantida que a Xunta acepte como válido” se non hai outro estudo.
Nun comunicado afirmaron que “de aceptar Alcoa agora a cualificación por parte da Xunta da Galiza como residuo perigoso, unha posíbel revisión da clasificación a posteriori sería difícil”. Ante esta situación, a central nacionalista exixe a Alcoa “que aprobe a inversión xa en xuño, antes de ter a categorización da Xunta".
