Unha delegación da CIG manterá esta terza feira en Bruxelas unha reunión co director da Competencia da Unión Europea e responsábel do expediente do Tax Lease. O encontro foi xestionado pola eurodeputada do BNG Ana Miranda .
Desde a central nacionalista sinalan: “trasladaremos a urxencia por resolver o expediente e a importancia que o naval ten na cidade de Vigo, maior que en ningunha outra parte do Estado, polo peso e número dos Estaleiros e polo volume de emprego que mobiliza; un sector estrutural, vital e histórico na economía da cidade”.
A CIG tamén quere saber a data prevista para a conclusión do expediente, a decisión sobre a retroactividade, os informes recibidos e as prácticas coñecidas doutros países como Holanda, Noruega ou mesmo Francia en aplicar deducións fiscais directas á innovación e tecnoloxía de orixe, que poden afectar ás normas de competencia.