Jessica Bouzas fai hoxe historia debutando en Wimbledon
A tenista vilagarciá Jessica Bouzas dará na tarde desta terza feira —contra as 18.45 horas— un paso de xigante na súa carreira profesional debutando no seu primeiro grand slam. Após superar na última rolda da fase clasificatoria de Wimbledon a australiana Olivia Gadecki (6-3, 6-3), Bouzas participará no prestixioso torneo británico cunha dura rival, a ucraína Anhelina Kalínina, número 26 do mundo, contra a que espera dar a sorpresa e pasar á seguinte eliminatoria.
