María Obelleiro reivindica no Carballiño a necesidade dun diario en galego

A campaña pola edición do número 1.000 de Nós Diario –que saíu do prelo hai este sábado unha semana, o pasado 11 de novembro– chegou nesta sexta feira ao Carballiño, cun acto organizado pola Agrupación Cultural Avantar e pola tenda do proxecto de deseño galego e en galego OZocoGZ. Na tarde de onte tomaron a palabra Darío Ángel Rodríguez, da AC Avantar, o escritor e filólogo Xoán Carlos Domínguez Alberte, e a directora de Nós Diario, María Obelleiro, que puxo en valor o feito de que un xornal en papel, escrito en galego e desde unha axenda galega, teña chegado a publicar o seu número 1.000. A vindeira semana a campaña do número 1.000 deste xornal continuará a terza feira, día 21, en Pontevedra, o 22 en Carballo (Bergantiños), o 23 na Guarda (Baixo Miño) e o 24 en Melide.