A Deputación de Ourense impulsa un sistema de administración por voz

A Deputación de Ourense anunciou esta cuarta feira "un novo avance" na súa transformación dixital coa posta en marcha dun sistema de "administración por voz", pioneiro na Galiza, que permite que as persoas máis vulnerábeis no ámbito tecnolóxico utilicen a administración electrónica "en igualdade de dereitos que a cidadanía dixital". Na presentación desta nova canle, participaron o presidente provincial, Luis Menor, a deputada de Benestar Social, Patricia Torres, e o director da área de Benestar da Deputación, Juan José Cerdeira, que fixeron unha demostración práctica deste sistema que utiliza a voz da persoa usuaria como a súa "sinatura biométrica vocal". O sistema xa está activo no Programa ChegOU de apoio á natalidade.