O tribunal de Luxemburgo —denominado oficialmente como Tribunal de Xustiza da Unión Europea— levou a cabo un dos principais traballos que nos debe un tribunal: aclarar a situación. En resposta a unha pregunta formulada por Pablo Llarena, maxistrado de instrución do Tribunal Supremo español, aclarounos as condicións que se deben dar para que un país europeo poida denegar unha euroorde a outro país europeo. E non é pouco, porque, cando as normas están claras, resulta máis fácil saber o que vai ocorrer e as consecuencias que vai carrexar.
Os maxistrados comunicaron á xustiza belga que só poden denegar unha petición do maxistrado do Tribunal Supremo nestes dous supostos: no caso de que a xustiza española vulnere dereitos básicos, e no caso de que o tribunal que levou a cabo o xuízo non teña realmente a potestade para levalo a cabo. O primeiro punto, pois, ten que ver coa falta de calidade da xustiza, coa parcialidade, coa falta de garantías e cun mal funcionamento sistémico.
É precisamente ese primeiro punto o que resulta máis interesante a quen se atopa en Bélxica como consecuencia do proceso catalán, pois os maxistrados europeos abriron unha porta á posibilidade de que a euroorde non sexa aprobada, xa que subliñan o feito de que, no caso de que o xuízo estea organizado en contra dun colectivo facilmente identificábel, a xustiza dun país —nesta ocasión, a xustiza belga no xuízo contra os cataláns— pode negarse a aceptar unha euroorde. O que agora falta é saber como vai interpretar a xustiza belga ese primeiro punto, é dicir, se considerará os dirixentes fuxidos como membros dun colectivo cuxos dereitos foron vulnerados.
O goberno español do PP e a xustiza española deron claras mostras de que iso é así. Non hai máis que lembrar a malleira que deu a policía aos cidadáns que o 1 de Outubro acudiron pacificamente a votar, e a condena que impuxeron aos políticos independentistas aos que acusaron de organizar o referendo. Resulta difícil atopar un argumento máis sólido.
Parece que ao xuízo lle espera un longo camiño nos tribunais.
