Tres eran tres. Para tanto ruído. No primeiro debate electoral, celebrado na Ser, non estivo presente Rueda, que non quixo satisfacer ese dereito da cidadanía. Estivo no seu lugar o portavoz parlamentario do PP, Pazos Couñago, que non é candidato, pero chámase Alberto, quen sabe se para despistar. E só con tres, sen máis formacións con opción a escano, abundaron a interrupción, o berro e as intervencións ao mesmo tempo.
Ana Pontón foi continuamente atropelada polas discusións acaloradas de Couñago e Gómez Besteiro. O popular, que optou por dirixirse unicamente ao candidato socialista, non atopou devasa en Besteiro, que seguiu a dinámica de dous. A nacionalista pediu paso e acabou tamén alzando a voz, como tantas facemos para que nos escoiten. E así, nunha tendencia bronca que está a extinguir o debate, as propostas afogaron entre tanto ruído.
