Hoxe celébranse eleccións presidenciais na Terra de Bolívar. 18.903.143 persoas inscritas para votar en 13.810 centros de votación, 899 no exterior como o do Consulado de Vigo, en 39.322 mesas de votación.
O xoves choveu en Caracas. Mentres a manifestación popular de apoio ao Presidente Chávez inundou o xoves as rúas, noutra parte da cidade xuntábanse seguidores do candidato Capriles Radonski. Na cidade respírase a tensión electoral dun pobo politizado e polarizado ao mesmo tempo. Son unhas eleccións moi importantes que van decidir moitas cousas non só para este país senon para o proceso de integración latinoamericana, se van nun sentido ou noutro.
Formando parte da Misión de Acompañamento Internacional organizada polo Consello Nacional Electoral (CNE), 250 persoas de todo o mundo, representantes de organizacións electorais, xurídicas, políticas, académicas, gremiais, xornalistas, analistas, iniciamos un intenso programa organizado polo Poder Electoral da República Bolivariana de Venezuela. Puidemos visitar o dispositivo integrado de votación, a instalación de mesas, reunirnos cos comandos electorais de ambos candidatos e hoxe desprazarnos a distintos estados federados para seguir o despregue territorial da observación.
Amañeceron hoxe os xornais venezolanos con titulares de “votación histórica” e coa nova de que o Centro Carter afirmaba “que o sistema electoral venezolano impide o fraude”. É que baixo a ignorancia dunha idea repetida e magnificada, é evidente que este é un dos sistemas máis auditados do mundo, contrastado e de maior fiabilidade electoral. Moitas mentiras repetidas van asentando unha verdade, por iso convén clarificar algunhas cousas para que moitas verdades repetidas combatan o que non é certo. Unha evidencia, chequeada por organismos electorais de todo o mundo, mentres continúa a insistencia e maledicencia de determinada imprensa internacional, algunha mesmo considerada progresista -entre eles algúns medios españois- falan dunha posible fraude electoral e da confusión de poderes. Unha idea falsa porque o Poder Electoral é un poder autónomo do poder público, independente do poder executivo, que exerce a función de árbitro na contenda electoral, e que como di a Constitución é “expresión da transformación da democracia representativa á democracia participativa e protagónica”. Esta elección presidencial acumula a experiencia de máis dunha década de incorporación de novas tecnoloxías ao sistema electoral, e a cidadanía venezolana asiste dende 2004 a procesos electorais automatizados. Mais a innovación destas eleccións é a incorporación ás mesas electorais do Sistema de Autenticación Integrada (SAI), unha ferramenta biométrica de autenticación da/do votante na que a electora ou o elector van poder certificar súa identidade na máquina de votación co seu número de documento de identidade e súa pegada dactilar.
Sen entrar nas opinión políticas que se están lendo estes días en determinados medios de comunicación e en especial nas interpretacións certamente manipuladas, creo que é necesario chamar a atención sobre a campaña de desprestixio do sistema electoral, que non só está infundada senon que ten unha clara intención de menosprezo e un enfoque parcial.
A mellora técnica do sistema fixo que exista unha mellora política no sentido da participación cidadá. Mellora dende o punto de vista da participación: no 1999, no referéndum consultivo participou o 37,8% dos votantes, mentres que no 2010, nas eleccións parlamentares o índice de participación foi do 66,4%. Mellora dende o punto de vista da igualdade e da inclusión política, implicando as maiorías que sempre foron discriminadas. Mellora dende o punto de vista da igualdade aos electoras e electores dende o prisma territorial, xa que a lonxanía dos centros de votación, que estaban centrados en centros urbanos de fácil acceso, discriminaba a poboación das áreas rurais e das áreas suburbanas da grandes cidades. Así pasouse de 8278 centros no ano 2000 a 14.055 no 2012, e de 7000 mesas de votación pasouse a 38.266 no mesmo período, un exemplo de achegamento de política participativa aos excluídos do sistema. Mellora do sistema para garantir a fiabilidade e a transparencia e combater a fraude , instalada na cultura política venezolana de sistemas pasados. Porque aquí desconfían, despois de tantas fraudes, ditaduras e manipulacións de voto, e é necesario informar que malia as manipulacións informativas, todos os partidos políticos venezolanos aceitan os resultados e decisión do Poder Electoral, como o que aconteceu no referendo da reforma constitucional de 2007 ou as parlamentarias de 2010. Por que polo tanto incitar a que se dubide, cando foi aceitado o sistema de auditoría e verificación electoral?
As organizacións políticas fixeron súas propostas, o poder electoral deu a información para realizar un voto seguro que impida a fraude e sexa o espello da súa vontade política. Participar con igualdade, nun día histórico na terra de Bolívar, exercendo a soberanía electoral que vai elixir ao Presidente da República Bolivariana de Venezuela a quen obteña a maioría simple de votos válidos. Como decía hoxe un cidadán ao instalar as mesas electorais en Maracaibo, estado federado de Zulia, onde me encontro e onde acabamos de estar ás 5 horas asistindo á instalación das mesas eleitorais: que flúa o proceso democrático!. O Pobo decide.
